ក្រុងយ៉ាំងហ្គោនៈ ឧត្តមស្នងការទទួលបន្ទុកជនភៀសខ្លួនអង្គការសហប្រជាជាតិ លោក Filippo Grandi បានថ្លែងកាលពីថ្ងៃសុក្រ នៅក្នុងការបញ្ចប់ដំណើរទស្សនកិច្ចដំបូងរបស់លោកទៅកាន់ប្រទេស មីយ៉ាន់ម៉ា ចាប់តាំងពីមានការបង្ក្រាបប្រឆាំងជនមូស្លីមរ៉ូហ៊ីងយ៉ាកាលពីឆ្នាំ ២០១៧ ថា ប្រទេស មីយ៉ាន់ម៉ា ត្រូវតែ «បង្ហាញលទ្ធផល» គួរឲ្យជឿជាក់ដល់ជនភៀសខ្លួនរ៉ូហ៊ីងយ៉ា ដើម្បីឲ្យវិលត្រឡប់ទៅកាន់មាតុប្រទេសវិញ។
យុទ្ធនាការបង្ក្រាបដោយយោធាយ៉ាងសាហាវនៅរដ្ឋរ៉ាក់ឃីនភាគខាងលិច បានបង្ខំឲ្យជនមូស្លីមរ៉ូហ៊ីងយ៉ាប្រហែល ៧៤ ម៉ឺននាក់ នៅតាមព្រំដែនរត់ភៀសខ្លួនចូលទៅប្រទេស បង់ក្លាដែស។
បច្ចុប្បន្ននេះ ជនរ៉ូហ៊ីងយ៉ាប្រហែល ១ លាននាក់ បានទទួលរងនូវការឈឺចាប់ នៅក្នុងជំរំជនភៀសខ្លួននានា ចេញពីរលកនៃការធ្វើទុក្ខបុកម្នេញខុសៗគ្នានោះ។
បេសកកម្មស្វែងរកការពិតរបស់អង្គការសហប្រជាជាតិ បានអំពាវនាវឲ្យក្រុមឧត្តមសេនីយ៍កំពូលៗរបស់ប្រទេស មីយ៉ាន់ម៉ា ត្រូវបាននាំយកមកផ្តន្ទាទោសពីបទ «ប្រល័យពូជសាសន៍» ហើយតុលាការឧក្រិដ្ឋកម្មអន្តរជាតិ (ICC) ត្រូវតែចាប់ផ្តើមស៊ើបអង្កេតលើករណីនេះ។
នៅអំឡុងដំណើរទស្សនកិចុ្ចរបស់លោក លោក Filippo Grandi បានថ្លែងទៅកាន់ទាំងជនរ៉ូហ៊ីងយ៉ា និងសហគមន៍ជនជាតិភាគតិចកាន់ព្រះពុទ្ធសាសនា ក្នុងក្រុងMaung daw និង Buthidaung នៅរដ្ឋរ៉ាក់ឃីនភាគខាងជើង ជាតំបន់ដែលរងអំពើហិង្សាធ្ងន់ធ្ងរ៕ AFP/SK