ក្រុងបាងកក: កាលពីថ្ងៃអង្គារ ប្រទេសថៃ បានស្ម័គ្រចិត្តធ្វើជាម្ចាស់ផ្ទះទទួលបើកកិច្ចជំនួបកំពូលរវាងប្រធានាធិបតី លោក ដូណាល់ ត្រាំ និងមេដឹកនាំកូរ៉េខាងជើង លោកគីម ជុងអ៊ុន ខណៈទីកន្លែងសម្រាប់ជំនួបនោះ មិនទាន់ត្រូវបានកំណត់នៅឡើយ។
រដ្ឋមន្ត្រីការបរទេសថៃលោក Don Pramudwinai បានថ្លែងប្រាប់ក្រុមអ្នកយកព័ត៌មានថា៖ «ប្រទេសថៃត្រៀមខ្លួនជាស្រេចដើម្បីធ្វើការសម្របសម្រួលនិងទទួលធ្វើជាម្ចាស់ផ្ទះបើកកិច្ចចរចានេះ» ថ្វីបើលោកបានសង្កត់ធ្ងន់ថា ប្រទេសថៃ មិនទាន់បានទាក់ទងពាក់ព័ន្ធបញ្ហានៃលទ្ធភាពនេះនៅឡើយនោះ។ ស្ថានទូតអាមេរិក បានបដិសេធមិនផ្តល់ការអធិប្បាយ អំពីបញ្ហានេះទេ។
លោកគីម ជុងអ៊ុន នឹងជួបប្រធានាធិបតីកូរ៉េខាងត្បូងលោក មូន ជេអ៊ីន នៅថ្ងៃសុក្រខាងមុខជាព្រឹត្តិការណ៍ មួយដែលត្រូវបានគេមើលឃើញថា ជាសកម្មភាពជាវិជ្ជមានមួយឆ្ពោះទៅរកជំនួបកំពូលជាមួយលោកត្រាំ។
នៅដើមខែនេះ លោក ត្រាំបានថ្លែងថា ទីតាំងចំនួន ៥ កំពុងស្ថិតក្រោមការពិចារណាសម្រាប់បើកកិច្ចជំនួប «ដែលទំនងជានៅដើមខែមិថុនា» ដែលលោកមានក្តីសង្ឃឹមថា អាចទៅរកការចុះកិច្ចព្រមព្រៀងលុបបំបាត់អាវុធនុយក្លេអ៊ែរជាមួយកូរ៉េខាងជើង។
ប៉ុន្តែ លោកមិនបានបញ្ជាក់អំពីទីកន្លែង ដោយបណ្តាលឲ្យក្រុមអ្នកសង្កេតការណ៍ធ្វើការសន្និដ្ឋានអំពីទីកន្លែងណាមួយរាប់ចាប់តាំងពីម៉ុងហ្គោល រហូតដល់តំបន់ស្កង់ឌីណាវ និងសិង្ហបុរី។ ប្រទេសថៃ គឺជាសម្ព័ន្ធមិត្តប្រវត្តិសាស្ត្រមួយដែលមានទំនាក់ទំនងការទូតជាមួយកូរ៉េខាងជើងដែរ។ ក្រុមអ្នកវិភាគមានគំនិតផ្សេងគ្នាអំពីបញ្ហានេះ៕