.jpg)
ទាហានឆ្មាំជាតិអាមេរិកត្រូវបានដាក់ពង្រាយនៅវ៉ាស៊ីនតោន។ រូបថត AFP
កាលពីថ្ងៃសៅរ៍ ទី ១៦ ទាហានឆ្មាំជាតិជាច្រើនកំពុងធ្វើដំណើរទៅកាន់ទីក្រុងវ៉ាស៊ីនតោន ខណៈអភិបាលរដ្ឋនីមួយៗឆ្លើយតបទៅនឹងការអំពាវនាវបន្ទាន់របស់មន្ត្រីការពារជាតិសហរដ្ឋអាមេរិកឱ្យបញ្ជូនទាហានបន្ថែម ដើម្បីធានាសន្តិសុខនៃរដ្ឋធានីនេះ។
ថ្នាក់ដឹកនាំយោធាអាមេរិកកាលពីថ្ងៃព្រហស្បតិ៍ និងថ្ងៃសុក្របានចំណាយពេលជាច្រើន ដើម្បីធ្វើការទាក់ទងទៅកាន់អភិបាលរដ្ឋនីមួយៗបន្ទាប់ពីក្រសួងការពារជាតិអាមេរិកបានអនុញ្ញាតឱ្យមានការបង្កើនកងទ័ពក្នុងក្រុងវ៉ាស៊ីនតោនរហូតដល់ទៅ ២៥ ០០០ នាក់ ដើម្បីគាំទ្រការធានាសន្តិសុខនៃពិធីចូលកាន់តំណែងរបស់ប្រធានាធិបតី Joe Biden នៅថ្ងៃទី ២០ ខាងមុខនេះ។ អភិបាលរដ្ឋភាគច្រើនបានបង្ហាញថា ពួកគេនឹងជួយ តែបញ្ជាក់ថា ពួកគេនឹងផ្ដល់អាទិភាពដល់ការធានាសុវត្ថិភាពនៃរដ្ឋពួកគេមុន។
អភិបាលខ្លះយល់ព្រមបញ្ជូនបន្ថែម រីឯខ្លះទៀតមិនអាចបញ្ជូន។ អភិបាលរដ្ឋ Pennsylvania លោក Tom Wolf បានបង្កើនចំនួនដែលលោកបានសន្យាបញ្ជូនទ្វេដងពីទាហានពី ១ ០០០ នាក់ទៅ ២ ០០០ នាក់។ រដ្ឋ Minnesota បន្ទាប់បីបានពិនិត្យលើស្ថានភាពសន្តិសុខរបស់ខ្លួនបានបង្កើនការបញ្ជូនឆ្មាំជាតិពី ១៣០ នាក់ ទៅ ៨៥០ នាក់។
អភិបាលរដ្ឋ Ohio លោក Mike DeWine បានយល់ព្រមបញ្ជូនទាហាន ៧០០ នាក់ តែក្រោយមកលោកបានបន្ថែមទាហានចំនួន ៣០០ នាក់ទៀត ខណៈពេលដែលលោកបញ្ជាឱ្យដាក់ពង្រាយទាហាននៅអគារសភារដ្ឋ Ohio។
សរុបមក ត្រឹមថ្ងៃសៅរ៍ មានជើងហោះហើរជាង ១៣០ ដឹកទាហានឆ្មាំយ៉ាងតិច ៧ ០០០ នាក់ ទៅកាន់មូលដ្ឋានទ័ពអាកាសរួម Andrews នៅរដ្ឋ Maryland ដែលជាប់នឹងរដ្ឋធានីវ៉ាស៊ីនតោន។ នេះបើតាមតាមមន្ត្រីសហរដ្ឋអាមេរិកដែលបាននិយាយទៅកាន់ភ្នាក់ងារព័ត៌មាន AP ក្នុងលក្ខខណ្ឌមិនបញ្ចេញអត្តសញ្ញាណ។ ទាហានរាប់ពាន់នាក់ទៀត គឺកំពុងធ្វើដំណើរតាមរថយន្តក្រុង និងរថយន្តយោធា។
ការដាក់ពង្រាយបន្ថែមទាហាននេះឆ្លុះបញ្ចាំងពីការភ័យខ្លាចថា ក្រុមជ្រុលនិយម គឺកំពុងរៀបចំធ្វើការវាយប្រហារក្រុងវ៉ាស៊ីនតោនម្ដងទៀត បន្ទាប់ពីមានការធ្វើកុបកម្មវាយសម្រុកចូលអគារសភាកាលពីថ្ងៃទី ៦ មករា ដែលឈានដល់ការស្លាប់បាតុករ ៤ នាក់ និងប៉ូលិស ១ នាក់។ FBI បានប្រាប់ទៅកាន់ភ្នាក់ងារប៉ូលិសទូទាំងប្រទេសថា បាតុកម្មតវ៉ាដោយក្រុមអ្នកគាំទ្រប្រធានាធិបតី Donald Trump ប្រដាប់ដោយអាវុធអាចនឹងកើតឡើងនៅរដ្ឋទាំង ៥០ ចាប់ពីថ្ងៃសៅរ៍ រហូតដល់ថ្ងៃលោក Biden ចូលកាន់អំណាច។
កាលពីថ្ងៃទី ៦ ខែមករា មានទាហានឆ្មាំជាតិត្រឹមតែជាង ១០០ នាក់ប៉ុណ្ណោះ ដែលត្រូវបានពង្រាយនៅវ៉ាស៊ីនតោន ដើម្បីធ្វើការយាមប៉ុស្តិ៍ត្រួតពិនិត្យ និងច្រកចូលស្ថានីយរថភ្លើងក្រោមដី។ ប៉ុន្មានម៉ោងបន្ទាប់ពីការធ្វើកុបកម្ម ទាហានឆ្មាំជាតិរដ្ឋធានីវ៉ាស៊ីនតោន ១ ១០០ នាក់ត្រូវបានបញ្ជូនទៅកាន់អគារសភា។ នៅថ្ងៃបន្ទាប់ ក្រោយពីទទួលបានព័ត៌មានថា អំពើហិង្សាអាចកើតឡើង មន្ត្រីយោធាបានស្នើសុំឱ្យអភិបាលរដ្ឋជិតខាងជួយបញ្ជូនទាហាន ៦ ២០០ នាក់បន្ថែម។
មកដល់ពេលនេះ រដ្ឋធានីវ៉ាស៊ីនតោន គឺមានលក្ខណៈកាន់តែស្រដៀងនឹងជំរំយោធា ដោយសារមានទាហានដើរល្បាតកាន់តែច្រើនការដាក់រនាំងបិទផ្លូវ ការដាក់របងបន្លានៅអគារសំខាន់ៗ និងការដាក់បម្រាមគោចរពីម៉ោង ៦ យប់ដល់ ៦ ព្រឹក។
គួរបញ្ជាក់ផងដែរថា កងឆ្មាំជាតិអាមេរិក គឺជាប្រភេទកងជីវពលដើរតួជាទាហានបម្រុងនៃកងទ័ពជើងគោក និងកងទ័ពជើងអាកាសអាមេរិក។ រដ្ឋនីមួយៗនៃសហរដ្ឋអាមេរិក មានកងឆ្មាំជាតិរៀងៗខ្លួន ដែលជាធម្មតាស្ថិតក្រោមអំណាចរបស់អភិបាលរដ្ឋនោះ ដោយជារឿយៗអភិបាលរដ្ឋបានប្រើប្រាស់កងឆ្មាំជាតិក្នុងការបង្ក្រាបក្រុមបាតុករហិង្សា ឬបំពេញបេសកកម្មសន្តិសុខផ្សេងៗ។ ក្រសួងការពារជាតិអាមេរិកអាចទាញយកកងឆ្មាំជាតិមកប្រើប្រាស់ក្នុងគោលបំណងខាងលើ ឬបញ្ជូនទាហានកងឆ្មាំជាតិទៅធ្វើសង្គ្រាមនៅបរទេស៕
