ក្រុងប៊ែរឡាំង៖ នៅក្នុងការប្រយុទ្ធប្រឆាំងវីរុសកូរ៉ូណា ប្រទេស អាល្លឺម៉ង់ កំពុងធ្វើតេស្តយ៉ាងទូលំទូលាយ និងការដាក់ឲ្យនៅដាច់ដោយឡែកដើម្បីផ្តាច់ខ្សែចង្វាក់ចម្លង ជាយុទ្ធសាស្ត្រមួយដែលត្រូវបានខ្ចីពីប្រទេស កូរ៉េខាងត្បូង ដែលទទួលបានជោគជ័យក្នុងការកាត់បន្ថយការរាលដាលនៃវីរុសនេះ បានក្លាយជាបំណងប្រាថ្នារបស់ពិភពលោក។
យោងតាមមន្ត្រីបានឲ្យដឹងថា ប្រទេស អាល្លឺម៉ង់ កំពុងអនុវត្តការធ្វើតេស្តច្រើនជាងប្រទេសដទៃនៅអឺរ៉ុប នៅអត្រាពី ៣០ ម៊ឺន ទៅ ៥០ ម៊ឺននាក់ ក្នុង ១ សប្តាហ៍។
យោងតាមឯកសារមួយរបស់ក្រសួងមហាផ្ទៃដែលបណ្តាញផ្សព្វផ្សាយអាល្លឺម៉ង់ជាច្រើនបានឃើញនោះបានឲ្យដឹងថា ប៉ុន្តែរដ្ឋាភិបាលរបស់លោកស្រីអធិការបតីអេនជេឡា មឺរកែល មានបំណងបង្កើនការតេស្តយ៉ាងតិច ២០ ម៊ឺននាក់ក្នុង ១ ថ្ងៃ។
គោលបំណងនេះ នឹងត្រូវធ្វើតេស្តអ្នកដែលសង្ស័យថា ពួកគេបានឆ្លងវីរុសនេះ និងមនុស្សទាំងអស់ដែលមានការពាក់ព័ន្ធនឹងករណីឆ្លង ដែលត្រូវបានគេបញ្ជាក់។
លក្ខណវិនិច្ឆ័យនៃការតេស្តនាពេលបច្ចុប្បន្ននេះ ផ្តោតទៅលើអ្នកមានរោគសញ្ញាជំងឺកូវីដ ១៩ និងបានទាក់ទងនឹងករណីដែលត្រូវគេបញ្ជាក់។
យោងតាមឯកសារនោះបានឲ្យដឹងថា គំនិតនេះ គឺត្រូវផ្លាស់ប្តូរពីការធ្វើតេស្តដែលបញ្ជាក់ពីស្ថានភាពទៅការធ្វើតេស្ត ដើម្បីរកមេរោគនេះតែម្តង។
អាវុធសំខាន់ក្នុងការប្រយុទ្ធប្រឆាំងវីរុសនេះ គឺការប្រើប្រាស់ទិន្នន័យទីតាំងរបស់ស្មាតហ្វូន ដើម្បីតាមដានការធ្វើដំណើររបស់អ្នកជំងឺ ដើម្បីតាមដានមនុស្ស ដែលឆ្លងជាសក្តានុពល ហើយត្រូវដាក់ឲ្យនៅដាច់ដោយឡែកពីគេ។
ទោះបីមន្ត្រីរដ្ឋាភិបាល និងអ្នកសិក្សារោគរាតត្បាត គាំទ្រការតាមដានតាមនេះក្តី ក៏វានៅតែជាគំនិតចម្រូងចម្រាសនៅអាល្លឺម៉ង់ដែរ៕ AFP/PSA