ក្រុងបេរូត: ក្រុមឃ្លាំមើល សិទ្ធិមនុស្សបានឲ្យដឹងកាលពីថ្ងៃចន្ទថា កងទ័ពរបបស៊ីរីជាង ១២ នាក់ត្រូវបានសម្លាប់អំឡុងការវាយប្រហារជាមួយក្រុមរដ្ឋអ៊ិស្លាម (IS) នៅក្នុងសង្កាត់ភាគខាងត្បូងនៃក្រុងដាម៉ាសដែលត្រូវបានបំផ្លិចបំផ្លាញ។
ក្រុមកងទ័ពដែលមានភក្តីភាពចំពោះប្រធានាធិបតី ស៊ីរី លោក បាសារ អាល់អាសាដបានបង្កើនប្រតិបត្តិការដែនគោក និងការវាយប្រហារផ្លូវអាកាសរបស់ពួកគេទៅលើជំរំជនភៀសខ្លួន Yarmuk នៅប៉ាឡេស្ទីន នៅក្នុងក្រុងដាម៉ាសភាគខាងត្បូងកាលពីថ្ងៃព្រហស្បតិ៍សប្តាហ៍មុន។
យោងតាមប្រភពព័ត៌មានពីក្រុមឃ្លាំមើលសិទ្ធិមនុស្សស៊ីរី (SOHR) បានឲ្យដឹងថា ចាប់តាំងពីពេលនោះមក ក្រុមយុទ្ធជនគាំទ្រលោកអាសាដ ១៥ នាក់ក៏ដូចជាក្រុមជីហាដ IS១៩ នាក់ត្រូវបានសម្លាប់ផងដែរ។
ក្រុមឃ្លាំមើលសង្គ្រាមមានមូលដ្ឋាននៅអង់គ្លេស បានឲ្យដឹងថា ការវាយប្រហារនោះក៏បានបណ្តាលឲ្យក្រុមជនស៊ីវិល ១២ នាក់មានទាំងស្ត្រី និងកូនក្មេងស្លាប់ផងដែរ។
ក្រុមឃ្លាំមើលនោះ បានឲ្យដឹងថា៖«កងទ័ពរបបស៊ីរី កំពុងបន្តធ្វើការវាយប្រហារដោយគ្រាប់បែកទៅលើផ្នែកនានានៅភាគខាងត្បូងនៃរដ្ឋធានីជាមួយការប្រើប្រាស់រ៉ុក្កែត កាំភ្លើងធំ ការវាយប្រហារផ្លូវអាកាសព្រមទាំងឧទ្ធម្ភាគចក្រថែមទៀត។
សង្កាត់ Yarmuk គឺជាសង្កាត់មួយធ្លាប់មានមនុស្សរស់នៅកកកុញនិងមានការរីកលូតលាស់ខ្លាំងនៅក្នុងក្រុងដាម៉ាស ប៉ុន្តែ សង្កាត់នេះបានរងការបំផ្លិចបំផ្លាញដោយអំពើហិង្សាចាប់តាំងពីជម្លោះនៅក្នុងទឹកដីស៊ីរីដែលបានផ្ទុះឡើងនៅក្នុងឆ្នាំ ២០១១ មកនោះ។
រដ្ឋាភិបាលស៊ីរី បានដាក់ការហ៊ុមព័ទ្ធប្រកបដោយការបំផ្លិចបំផ្លាញនៅលើសង្កាត់នេះ ក្នុងឆ្នាំ ២០១២ ហើយដែលការវាយប្រយុទ្ធគ្នា ក៏បានផ្ទុះឡើងរវាងក្រុមឧទ្ទាមនិងគូបដិបក្សក្រុមជីហាដរដ្ឋអ៊ិស្លាម IS។
នៅក្នុងឆ្នាំ ២០១៥ ក្រុម IS បានធ្វើការត្រួតត្រាលើផ្នែកជាច្រើននៃសង្កាត់ Yarmuk ហើយក្រុមឧទ្ទាមដទៃទៀតមានក្រុមជីហាដរួមទាំងក្រុមមកពីអតីតសាខារបស់អាល់កៃដាបានឯកភាពគ្នាដកកងទ័ពចេញកាលពី ២ ឬ ៣ សប្តាហ៍កន្លងទៅ។
ជាបន្តបន្ទាប់និងភ្លាមៗ យោធាស៊ីរីបានច្បាំងដណ្តើមជាថ្មីនូវតំបន់ឈរជើងក្រុមឧទ្ទាមចុងក្រោយនៅក្នុងតំបន់ Ghouta ភាគខាងកើត ជាតំបន់ជាយក្រុងមួយរបស់ក្រុងដាម៉ាស ដែលបានក្លាយជាកំពែងឈរជើងការពារដ៏រឹងមាំរបស់ក្រុមបក្សប្រឆាំងនៅក្បែររដ្ឋធានី។
កាលពីសប្តាហ៍មុន កងទ័ពរដ្ឋាភិបាលស៊ីរី បានប្តូរការចាប់អារម្មណ៍របស់ពួកគេទៅកាន់សង្កាត់ Yarmuk ប៉ុន្តែ ក្រុមអង្គការមនុស្សធម៌ បានធ្វើប្រកាសអាសន្នអំពីបញ្ហានេះ។
ទីភ្នាក់ងារជនភៀសខ្លួនប៉ាឡេស្ទីនរបស់អ.ស.ប.បានឲ្យដឹងថា ការវាយប្រហារផ្លូវអាកាសបានធ្វើឲ្យមន្ទីរពេទ្យកំពុងដំណើរការចុងក្រោយនៅក្នុងសង្កាត់ Yarmuk ផ្អាកដំណើរការ និងបានធ្វើឲ្យភាគច្រើននៃជនស៊ីវិល ដែលនៅសល់ ៦ ពាន់នាក់ក្នុងជំរំបាត់បង់លំនៅឋាន៕