ក្រុងហ្គាហ្សា៖ មន្ត្រីជាន់ខ្ពស់ម្នាក់របស់ទីភ្នាក់ងារជួយសង្គ្រោះ និងការងាររបស់អង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន នៅក្នុងតំបន់ក្បែរភាគខាងកើត (UNRWA) កាលពីថ្ងៃអាទិត្យ បានព្រមានអំពីផលវិបាកនានាពីការឆ្លងរីករាលដាលវីរុសផ្លូវដង្ហើមកូរ៉ូណាប្រភេទថ្មីដ៏ចម្លែកនៅតំបន់ហ្គាហ្សា។
ប្រធានរបស់ទីភ្នាក់ងារជួយសង្គ្រោះ និងការងាររបស់អង្គការសហប្រជាជាតិ UNRWA នៅក្នុងតំបន់ហ្គាហ្សា គឺលោក ម៉ាតធីស ស្មាលី បានថ្លែងប្រាប់ក្រុមអ្នកកាសែតថា អង្គការនេះមានការព្រួយបារម្ភយ៉ាងខ្លាំងចំពោះការឆ្លងរីករាលដាលវីរុសផ្លូវដង្ហើមកូរ៉ូណាប្រភេទថ្មីនេះ នៅក្នុងការបង្ហាញពីស្ថានការណ៍ដែលងាយរងប៉ះពាល់នៅក្នុងតំបន់ហ្គាហ្សា ដោយបានសង្កត់ធ្ងន់ថា ការគ្រប់គ្រងវិបត្តិបែបនេះ នឹងជួប «ផលវិបាកយ៉ាងធ្ងន់ធ្ងរ»។
លោក ម៉ាតធីស ស្មាលី បានថ្លែងថា តំបន់ហ្គាហ្សាកំពុងប្រឈមនឹងការខ្វះខាតធនធានយ៉ាងខ្លាំង ដោយសារអ៊ីស្រាអែលរាំងខ្ទប់តំបន់ឆ្នេរសមុទ្ររយៈពេល ១៣ ឆ្នាំ។
លោកបានថ្លែងថា៖ «វាមិនសមហេតុផលទាល់តែសោះដែលយើងគិតថា កន្លែងមួយដូចជាតំបន់ហ្គាហ្សា អាចត្រូវបានគេដាក់ឲ្យនៅដាច់ដោយឡែកពីពិភពលោកបែបនេះ ដែលបានដាក់អ្នកគ្រប់គ្នានៅក្នុងនោះមានពលរដ្ឋប៉ាឡេស្ទីនឲ្យស្ថិតនៅក្រោមការទទួលខុសត្រូវ ចំពោះការបញ្ឈប់ការឆ្លងរីករាលដាលវីរុសផ្លូវដង្ហើមកូរ៉ូណាប្រភេទថ្មីដ៏ចម្លែកនេះ» ដោយបន្ថែមថា៖ «ស្ថានការណ៍យ៉ាងអាក្រក់បំផុត គឺការឆ្លងជំងឺកូវីដ ១៩ ដាក់ឲ្យស្ថិតនៅក្រោមការបិទតំបន់ហ្គាហ្សាទាំងស្រុង»។
លោកបានអំពាវនាវឲ្យដក ការរាំងខ្ទប់ដែលបានដាក់នៅតំបន់ហ្គាហ្សាចាប់តាំងពីឆ្នាំ ២០០៧ ហើយបង្ហាញពីសារៈសំខាន់នៃការផ្តល់បរិក្ខារពេទ្យសម្រាប់ការពារដល់តំបន់ហ្គាហ្សា៕ Xinhua/SK