.jpg)
ក្រុមអ្នកតវ៉ាស៊ូដង់បើកពិលទូរស័ព្ទស្មាតហ្វូននៅក្នុងអំឡុងការតវ៉ានៅខាងក្រៅទីបញ្ជាការយោធា។ AFP
ក្រុងខារទុំៈ មេដឹកនាំយោធាស៊ូដង់កាលពីថ្ងៃអាទិត្យបានសន្យាថា លោកប្តេជ្ញាប្រគល់អំណាចឲ្យប្រជាជន ខណៈអ្នកតវ៉ាជាច្រើននៅខាងក្រៅទីបញ្ជាការកងទ័ពរង់ចាំការបកស្រាយពីក្រុមប្រឹក្សាស៊ីវិល។
មេដឹកនាំយោធាថ្មី លោក ឧត្តមសេនីយ៍ Abdel Fattah al-Burhan ក៏បានប្តេជ្ញាឆ្លើយតបតាមការទាមទាររបស់ក្រុមអ្នកតវ៉ានៅក្នុងរយៈពេល ១ សប្តាហ៍ និងបានអះអាងថា ប្រាក់សុទ្ធជាង ១១៣ លានដុល្លារត្រូវបានរឹបអូសពីលំនៅឋានរបស់លោកប្រធានាធិបតីអូមារអាល់បាសៀរដែលត្រូវគេបណ្តេញចេញពីតំណែងនោះ។
កាលពីថ្ងៃអាទិត្យ ក្រុមអ្នកតវ៉ាបានគ្រវីទង់ជាតិ និងកាន់ទូរស័ព្ទដៃរបស់ពួកគេ ខណៈពេលរាត្រីបានចូលមកដល់ ពន្លឺដែលចាំងទៅលើសម្ភាររបស់ពួកគេបង្កើតឲ្យមានភ្លើងចម្រុះពណ៌នៅខាងក្រៅទីបញ្ជាការយោធា ជាទីដែលពួកគេបានបោះជំរំនៅមុនលោកបាសៀរដួលរលំ កាលពីថ្ងៃទី ១១ ខែមេសា។
ដោយទះដៃ និងគ្រវីទង់ជាតិស៊ូដង់ ហ្វូងមនុស្សបានរង់ចាំក្រុមមេដឹកនាំរបស់ពួកគេ ដើម្បីប្រកាសប្រាប់ក្រុមប្រឹក្សាស៊ីវិលថា ពួកគេចង់បានអំណាចពីក្រុមមេដឹកនាំយោធាខណៈដែលឧបករណ៍បំពងសំឡេងចាក់ចម្រៀងជាតិ និងបដិវត្តន៍។
អ្នកតវ៉ាលើកទង់ជាតិស៊ូដង់នៅក្នុងអំឡុងការតវ៉ានៅខាងក្រៅទីបញ្ជាការយោធាកាលពីថ្ងៃទី ២១ ខែមេសា។ AFP
ហ្វូងអ្នកតវ៉ាស្រែកបន្ទរថាប្រទេសស៊ូដង់ ពិតជាខ្ពង់ខ្ពស់ណាស់។ ពួកគេ បានប្តេជ្ញាថា៖ «បដិវត្តន៍របស់យើង គឺជាបដិវត្តន៍ស៊ីវិល និងត្រូវបានការពារដោយប្រជាជន»។
ក្រុមអ្នកតវ៉ា បានស្រែកបន្ទរថា «សេរី» និងថា តើរបបនេះដួលរលំ ឬអត់? ពួកគេកំពុងបន្តធ្វើការងារនេះដោយបានប្តេជ្ញាបន្តការដាក់សម្ពាធទៅលើក្រុមប្រឹក្សាយោធាថ្មីរបស់ប្រទេសនេះ។
លោក Burhan ប៉ូលិសយោធា និងក្រុមទីភ្នាក់ងារសន្តិសុខបានរកឃើញប្រាក់សុទ្ធ ៧ លានអឺរ៉ូ (៧,៨ លានដុល្លារ) ៣៥០,០០០ ដុល្លារ និង ៥ ពាន់លានផោនស៊ូដង់ (១០៥ លានដុល្លារ) នៅក្នុងការឆែកឆេរផ្ទះរបស់លោកបាសៀរ។
ទន្ទឹមគ្នានោះ អារ៉ាប៊ី សាអ៊ូឌីត និងអារ៉ាប់រួមកាលពីថ្ងៃអាទិត្យបានផ្តល់ទឹកប្រាក់ ៣ ពាន់លានដុល្លារជាជំនួយហិរញ្ញវត្ថុដល់ប្រទេស ដែលខ្វះខាតលុយកាក់មួយនេះ។
ប្រទេសអាមេរិកភាគឦសាននេះ គឺជាប្រទេសមួយក្នុងចំណោមប្រទេសក្របំផុតនៅក្នុងពិភពលោក ហើយប្រឈមនឹងការខ្វះខាតហិរញ្ញវត្ថុបរទេសយ៉ាងខ្លាំង ជាកត្តាមួយ ដែលជួយបង្កឲ្យមានការតវ៉ានៅទូទាំងប្រទេសប្រឆាំងនឹងលោកបាសៀរ។
ក្រុមអ្នកតវ៉ាស៊ូដង់ ជួបជុំគ្នា ខណៈពួកគេស្រែកបន្ទរពាក្យស្លោក និងគ្រវីទង់ជាតិនៅក្នុងអំឡុងការតវ៉ា។ AFP
ក្រុមប្រឹក្សាយោធាមួយ បានចូលជាធរមានសម្រាប់រយៈពេលអន្តរកាល ២ ឆ្នាំ ប៉ុន្តែទោះបីជាមានការចរចាជាមួយក្រុមអ្នកតវ៉ាក្តី ក៏ភាគីទាំង ២ បានខិតខំប្រឹងប្រែងដើម្បីឈានដល់កិច្ចព្រមព្រៀងបង្កើតរដ្ឋាភិបាលស៊ីវិលមួយ។
នៅក្នុងបទសម្ភាសលើកដំបូងរបស់លោកនៅមុខទូរទស្សន៍រដ្ឋ ចាប់តាំងពីឡើងកាន់អំណាចលោក Burhan បានបញ្ជាក់ថា៖ «ក្រុមប្រឹក្សានេះ ប្តេជ្ញាផ្តល់អំណាចជូនប្រជាជន»។
លោកក៏បាននិយាយថា គណៈប្រតិភូមួយក្រុមគ្រោងធ្វើដំណើរទៅកាន់ក្រុងវ៉ាស៊ីនតោននៅពេលឆាប់ៗនេះ ដើម្បីដកប្រទេសស៊ូដង់ចេញពីបញ្ជីឈ្មោះក្រុមប្រទេសដែលឧបត្ថម្ភដល់អំពើភេរវកម្ម។
សមាគមអាជីពស៊ូដង់ (SPA) ដែលនាំមុខក្នុងធ្វើការតវ៉ាបាននិយាយថា ខ្លួននឹង ប្រកាសក្រុមប្រឹក្សាស៊ីវិលរបស់ខ្លួននៅពេលក្រោយ។
អ្នកតវ៉ាម្នាក់និយាយថា យើង រងចាំក្រុមប្រឹក្សានេះ៕
