ក្រុងវ៉ាស៊ីនតោនៈ រដ្ឋចំនួន ៥ របស់អាមេរិក កំពុងតែបដិសេធមិនពង្រាយកម្លាំងសន្តិសុខជាតិនៅឯព្រំប្រទល់អាមេរិក និងម៉ិកស៊ិកនៅចំពេលដែលការមិនពេញចិត្តទៅ នឹងគោលនយោបាយអន្តោប្រវេសន៍ដ៏ចម្រូងចម្រាសរបស់លោកប្រធានាធិបតី ដូណាល់ត្រាំ កំពុងតែផ្ទុះឡើងហើយគោលនយោបាយនេះទៀតសោត បានធ្វើឲ្យកុមារភៀសខ្លួនជាច្រើនត្រូវព្រាត់ប្រាសពីឪពុកម្ដាយទៀតផង។
ទាំងចៅហ្វាយរដ្ឋមកពីរដ្ឋ កូឡូរ៉ាដូ ញូវយ៉ក និងវើជីនៀ ដែលមកពីបក្សប្រជាធិបតេយ្យនិងទាំងចៅហ្វាយរដ្ឋម៉ារីឡេន និងរដ្ឋម៉ាសាឈូសេតដែលមកពីគណបក្សសាធារណរដ្ឋបានថ្លែងថា ពួកគេនឹងមិនបញ្ជូនកម្លាំងសន្តិសុខជាតិនៅក្នុងរដ្ឋរបស់ពួកគេឲ្យទៅអនុវត្ត កាតព្វកិច្ចព្រំដែននោះទេ។
ចៅហ្វាយរដ្ឋញូវយ៉ក លោក Andrew Cuomo ដែលមកពី បក្សប្រជាធិបតេយ្យ បានថ្លែងកាលពីថ្ងៃអង្គារថា៖ «យើងនឹងមិនយកខ្លួនទៅជាប់ពាក់ព័ន្ធជាមួយនឹងសោកនាដកម្មមនុស្សជាតិ ដែលបាននិងកំពុងកើតឡើងនោះទេ»។
លោក Cuomo បានសរសេរលើប្រព័ន្ធធ្វីធើរថា៖ «នៅចំពោះមុខនៃទង្វើអមនុស្សធម៌របស់រដ្ឋាភិបាលរដ្ឋសហព័ន្ធនោះ រដ្ឋនឹងមិនបញ្ជូនកម្លាំងសន្តិសុខជាតិរបស់ខ្លួនទៅកាន់ព្រំដែនជាដាច់ខាត»។
លោក Larry Hogan ដែលជាចៅហ្វាយរដ្ឋម៉ារីឡេនមកពីគណបក្សសាធារណរដ្ឋ បានថ្លែងថា លោកនឹងមិនបញ្ជូនកម្លាំងសន្តិសុខជាតិរបស់ខ្លួនទៅកាន់ព្រំដែននោះទេ លុះត្រាតែគោលនយោបាយ ដែលបានបំបែកបំបាក់កូនក្មេង និងគ្រួសាររបស់ពួកគេត្រូវបានលុបចោលជាមុនសិន។
លោក Hogan បានថ្លែងថាលោកបានបញ្ជាយានិកឧទ្ធម្ភាគចក្រចំនួន ៤ នាក់ ដែលត្រូវបានដាក់ពង្រាយនៅព្រំដែនក្នុងរដ្ឋម៊ិកស៊ិកថ្មីឲ្យវិលត្រឡប់មកផ្ទះវិញជាបន្ទាន់។
លោក Hogan ថ្លែងថា៖ «កិច្ចខិតខំប្រឹងប្រែងក្នុងការអនុវត្តច្បាប់អន្តោប្រវេសន៍ គួរតែផ្ដោតសំខាន់ទៅលើតែឧក្រិដ្ឋជន»៕