.jpg)
លោក ប្រាយុធ ចាន-អូចា ថ្លែងទៅកាន់ប្រជាជននៅក្រុងបាងកក។ BKP
ក្រុងបាងកកៈ យោងតាមការស្ទង់មតិរបស់សាកលវិទ្យាល័យសួនដូស៊ីតរ៉ាចាផាត់ ឬសួនដូស៊ីត បានឲ្យដឹងថា មនុស្សភាគច្រើនជឿថា ជម្លោះនយោបាយថៃ ទំនងជានៅបន្តក្រោយពីរដ្ឋាភិបាលថ្មីមួយ ត្រូវបានចូលជាធរមាន។
ការស្ទង់មតិនោះ ត្រូវបានធ្វើឡើង ចន្លោះពីថ្ងៃទី ២២ ដល់ ២៥ ទៅលើមនុស្សចំនួន ១ ១០៧ នាក់ ដើម្បីប្រមូលទស្សនៈរបស់ពួកគេជុំវិញស្ថានការណ៍នយោបាយនៅ ប្រទេស ថៃ ក្រោយពីការបោះឆ្នោតនៅថ្ងៃទី ២៤ ខែ មីនា។
ដោយត្រូវបានសួរអំពីថាតើពួកគេគិតថា ជម្លោះនយោបាយអាចនឹងកើតមានឬទេ ក្រោយពីរដ្ឋាភិបាលថ្មី ត្រូវបង្កើតឡើងនោះ? ៥២,២១ ភាគរយបានជឿជាក់ថា ជម្លោះនយោបាយ នឹងកើតឡើងដូចមុន ចាប់តាំងពីបញ្ហានោះ ត្រូវបានចាក់ឫសយ៉ាងជ្រៅ។
ចំនួន ៣៤,០៦ ភាគរយគិតថាអាចនឹងមានជម្លោះកាន់តែច្រើន ដោយសារតែ អ្នកនៅក្នុងជម្លោះ នឹងមិនអាចផ្សះផ្សាបានដោយងាយស្រួលទេ និង ១៣,៧៣ ភាគរយ បាននិយាយថា ជម្លោះនោះ នឹងធ្លាក់ចុះ ដោយជឿជាក់ថា រដ្ឋាភិបាលថ្មី នឹងអាចគ្រប់គ្រងស្ថានការណ៍បាន។
ដោយត្រូវបានស្នើឲ្យអធិប្បាយអំពីការបែកបាក់ និងការតស៊ូរបស់បណ្តាគណបក្សនយោបាយក្នុងការបង្កើតរដ្ឋាភិបាលមួយនោះ ៣១,៥៩ ភាគរយ បាននិយាយថា គណបក្សទាំងអស់កំពុងប្រយុទ្ធប្រឆាំងដើម្បីផលប្រយោជន៍ ដោយបានធ្វើឲ្យប៉ះពាល់មុខមាត់ប្រទេស ២៣,៧៩ ភាគរយ ចង់ឲ្យរដ្ឋាភិបាលថ្មីត្រូវបានបង្កើតឲ្យបានឆាប់តាមដែលអាចធ្វើទៅបាន៕ BKP/SK
