ក្រុងសេអ៊ូល៖ ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃពុធថា ព្យុះទីហ្វុងមួយដែលបានវាយប្រហារទៅលើប្រទេសកូរ៉េខាងជើង បានបំផ្លិចបំផ្លាញស្ពានជិត ៦០ កន្លែង ឬបានលិចផ្ទះជាង ២ ០០០ ខ្នង ដោយមេដឹកនាំកូរ៉េខាងជើងលោក គីម ជុងអ៊ុន បានថ្លែងថា ការខូចខាតនោះ បានរំខានដល់ផែនការមជ្ឈិមពេញ ១ ឆ្នាំ។
ព្យុះទីហ្វុងមេយ៍សាក់ (Maysak) បានបង្កឲ្យមានភ្លៀងធ្លាក់យ៉ាងខ្លាំងអស់ជាច្រើនថ្ងៃ នៅឆ្នេរសមុទ្រភាគខាងកើតប្រទេសកាលពីសប្តាហ៍មុន នៅពេលស្រដៀងគ្នានោះ ប្រទេសកូរ៉េខាងជើង នៅតែកំពុងទទួលរងដោយសារទឹកជំនន់ និងព្យុះទីហ្វុងបង្កឲ្យមានការខូចខាតយ៉ាងខ្លាំង កាលពីពេលថ្មីៗនេះ ហើយនៅសប្តាហ៍នេះ ប្រទេសកូរ៉េខាងជើង បានរងការវាយប្រហារ ដោយសារព្យុះទីហ្វុងហៃសិន (Haishen) ១ ផ្សេងទៀត។
ទីភ្នាក់ងារសារព័ត៌មាន KCNA ផ្លូវការបាននិយាយថា ព្យុះទីហ្វុងមេយ៍សាក់ «បានបំផ្លិចបំផ្លាញ ឬបានធ្វើឲ្យមានទឹកជំនន់ជន់លិច» ផ្ទះជាង ២ ០០០ ខ្នង និងអគារសាធារណៈចំនួន ១០ អគារ នៅក្នុងតំបន់មួយចំនួនបានរងផលប៉ះពាល់ ចំណែកផ្លូវជាច្រើនមានចម្ងាយ ៦០ គីឡូម៉ែត្រ និង ៥៩ ស្ពានទៀត បានបាក់រលំ ដោយមានគ្រឹះផ្លូវរថភ្លើងប្រវែងជាង ៣ ៥០០ ម៉ែត្រ «ត្រូវបានខូចខាតទាំងស្រុងគ្មានសល់»។
គ្រោះមហន្តរាយធម្មជាតិបានបង្កឲ្យមានផលប៉ះពាល់កាន់តែខ្លាំងឡើងនៅកូរ៉េខាងជើង ដោយសារហេដ្ឋារចនាសម្ព័ន្ធរបស់ខ្លួនញ័រកក្រើក ហើយប្រទេសនេះបានរងការប៉ះពាល់ដោយទឹកជំនន់ ដោយសារភ្នំ និងកូនភ្នំ ត្រូវបានកាប់បំផ្លាញព្រៃឈើ អស់ជាយូរហើយនោះ៕ AFP/SK