កាលពីថ្ងៃសៅរ៍ ទី ២៧ កុម្ភៈ រដ្ឋបាលឱសថ និងម្ហូបអាហារ (FDA) បានធ្វើការអនុញ្ញាតឱ្យប្រើប្រាស់វ៉ាក់សាំងកូវីដ ១៩ ផលិតដោយក្រុមហ៊ុនអាមេរិក Johnson & Johnson ក្នុងគ្រាអាសន្ន ដែលជាវ៉ាក់សាំងទី៣ អនុញ្ញាតឱ្យប្រើប្រាស់ក្នុងអាមេរិក បន្ទាប់ពី Pfizer/BioNTech និង Morderna។
វ៉ាក់សាំងនេះ ត្រូវបានធ្វើការសាកល្បងលើមនុស្សជាង ៤៤ ០០០ នាក់ នៅសហរដ្ឋអាមេរិក អាហ្វ្រិកខាងត្បូង និងអាមេរិកឡាទីន។ ទិន្នន័យបានមកការសាកល្បងនេះ បានបង្ហាញមានប្រសិទ្ធភាព ៦៦,១% ប្រឆាំងនឹងករណីកូវីដ ១៩ ធ្ងន់ធ្ងរ បន្ទាប់ពីការចាក់យ៉ាងហោចណាស់ ៤ សប្ដាហ៍នេះ បើយោងតាមការវិភាគរបស់ FDA ។ ទិន្នន័យនៅសហរដ្ឋអាមេរិកថា វ៉ាក់សាំងនេះមានប្រសិទ្ធភាព ៧២% និងផ្តល់ការការពារ ៨៦% ប្រឆាំងនឹងករណីធ្ងន់ធ្ងរ។
វ៉ាក់សាំងនេះ មានផលប៉ះពាល់តិចតួច ដែលភាគច្រើនមានលក្ខណៈស្រាល ដូចជាការឈឺចាប់នៅកន្លែងចាក់ ឈឺក្បាល អស់កម្លាំង និងឈឺសាច់ដុំ។ ផលប៉ះពាល់ធ្ងន់ធ្ងរ គឺមិនកើតឡើងច្រើនទេ ហើយមិនមានករណីប្រតិកម្មអាលែ្លកហ្ស៊ីធ្ងន់ធ្ងរកើតឡើង បន្ទាប់ពីការចាក់វ៉ាក់សាំងនៅក្នុងការសាកល្បង។
វ៉ាក់សាំង Johnson&Johnson ប្រើប្រាស់បច្ចេកវិទ្យាវ៉ិចទ័រវីរុសកែច្នៃពី Adenovirus ស្វា Chimpanzee ដូចវ៉ាក់សាំងអង់គ្លេស AstraZeneca ដែលមានលក្ខណៈងាយស្រួលរក្សាទុក និងដឹកជញ្ជូន ហើយមានតម្លៃទាបជាងបច្ចេកវិទ្យាវ៉ាក់សាំងផ្សេងទៀត។ វ៉ាក់សាំងនេះមានលក្ខណៈខុសពីវ៉ាក់សាំងកូវីដ ១៩ ផ្សេងទៀត ដោយត្រូវការការចាក់វ៉ាក់សាំងតែ ១ ដូសប៉ុណ្ណោះ ដើម្បីទទួលបានការការពារ៕