ភ្នំពេញ៖ បណ្ដាទូទាំងពិភពលោករួមទាំងកម្ពុជា សុទ្ធតែប្រឈមនឹងបញ្ហាសំរាម។ យោងតាមសម្ដីអ្នកនាង សេនឌី ខូតាន់ (Sandy Kotan) ជាជនជាតិអាមេរិក ហើយក៏ជាស្ថាបនិក និងអ្នកគ្រប់គ្រងសហគ្រិនសង្គម Only One Planet ការស្រាវជ្រាវរយៈពេល ៥០ ឆ្នាំកន្លងមក មកទល់ពេលនេះ ផលប៉ះពាល់ពីប្លាស្ទិក និងធាតុគីមីបានធ្វើឱ្យលទ្ធភាពស្ត្រីមានគភ៌សល់ត្រឹមតែ ៥០% ប៉ុណ្ណោះ។
ស្ត្រីដែលបានរស់នៅកម្ពុជារយៈពេល ៦ ឆ្នាំមកហើយ និងបានបង្កើនសហគ្រាសសង្គមក្នុងគោលដៅស្វែងរកជម្រើសកាត់បន្ថយ និងកែច្នៃសំរាមប្លាសិ្ទករូបនេះបានផ្ដួចផ្ដើមគំនិតក្នុងការបង្កើតពិព័រណ៍ថ្មីមួយឈ្មោះថា Cambodia''s First Repair Fair ដើម្បីសាបព្រោះចំណេះដឹងជួសជុលរបស់របរខូចៗ ក្នុងគោលដៅបញ្ចៀសកុំឱ្យមានសំរាមច្រើននៅលើភពផែនដី ក៏ដូចជាគាំទ្រសិប្បកម្មតូចៗរបស់ប្រជាជនខ្មែរផងដែរ។
សហគ្រិនវ័យ ៥៦ ឆ្នាំរូបនេះ បានរំឭកពីគំនិតដែលនាំឱ្យកញ្ញាចាប់ផ្ដើមពិព័រណ៍នេះឡើងថា៖ «ខ្ញុំបានឃើញក្រុមក្នុងគេហទំព័រហ្វេសប៊ុកមួយមានឈ្មោះថា Phnom Penh Minimalist and Freecycle វាជាគេហទំព័រមួយ ដែលសមាជិកតែងបង្ហោះពីការចែកចាយរបស់ដែលខ្លួនឈប់ប្រើ ឬក៏របស់ចាស់ខូចៗទៅអ្នកដែលមានចំណាប់អារម្មណ៍ចង់ប្រើប្រាស់ ឬយកទៅកែច្នៃបន្ត»។
អ្នកនាងបានលើកឡើងថា៖ «ខ្ញុំយល់ថា ពួកគាត់អាចនឹងគ្មានពេលសម្រាប់យកទៅជួសជុលពិបាកក្នុងការដើរផ្សាររកកន្លែងធ្វើរាល់វត្ថុដែលខូច។ ខ្ញុំក៏កើតមានគំនិត រៀបចំពិព័រណ៍ជួសជុលនេះឡើង»។
គុណសម្បត្តិនៃការរៀបចំនេះ គឺសម្រាប់អ្នកដែលមានសម្ភារខូចៗពួកគាត់អាចប្រមូលយកមកធ្វើក្នុងថ្ងៃតែ ១ ហើយកន្លែងតែ ១ បាន ព្រោះនៅថ្ងៃនោះនឹងមានវត្តមានជាងជួសជុលជំនាញខុសៗគ្នានៅក្នុងសួនឧត្តម (Odom Garden) រួមទាំងអ្នកធ្វើសម្ភារកែច្នៃផងដែរ។
អ្នកនាងបានឱ្យដឹងថា គិតត្រឹមថ្ងៃនេះ ចំនួនជាងមាន ១៤ នាក់ ក្នុងជំនាញជួសជុលស្បែកជើង នាឡិកា គ្រឿងអលង្ការ ទូរស័ព្ទ កាតាប និងវត្ថុផ្សេងៗទៀត។ អ្នកចូលរួមនឹងទទួលបានការជួសជុលការបង្រៀនជួសជុលពីសម្ភារសាមញ្ញៗ ការបង្រៀនដាំបន្លែនៅតាមផ្ទះលើរានហាលផ្ទាល់ខ្លួន និងសកម្មភាពគិតគូរបរិស្ថានដទៃទៀត។
អ្នកចូលរួមមិនតម្រូវឱ្យមានការបង់ប្រាក់ទៅលើការជួសជុលណាមួយទេ ក្រៅពីតម្រូវឱ្យមានការបង់តែ ១ ដុល្លារសម្រាប់ផ្លូវចូលតែប៉ុណ្ណោះ ហើយកុមារមិនត្រូវបានគិតថ្លៃទេ។
ក្នុងចំណោមអ្នកចូលរួមពិព័រណ៍នេះ ស្នួខោអាវ Clothesline Resale Boutique ជាហាងបើកលក់អីវ៉ាន់ប្រើប្រាស់បន្ត និងទទួលការបរិច្ចាគសម្ភារផ្សេងៗ ដែលបើកដំណើរការកាលពី ៥ ឆ្នាំមុន ដោយមានស្ថាបនិកជាកញ្ញា យ៉ិន ចិន្តា និង កញ្ញា អេមី វន ដេស។
កញ្ញា យ៉ិន ចិន្តា រៀបរាប់ពីចំណាប់អារម្មណ៍ចូលរួមពិព័រណ៍នេះថា៖ «ជាផ្នែកមួយនៃពិព័រណ៍ជួសជុល យើងពិតជារីករាយណាស់។ យើងស្រឡាញ់សហគមន៍ហើយយើងផ្ដើមគិតអំពីបរិស្ថានរបស់យើង»។
កញ្ញាបន្តថា៖ «តាមរយៈការចូលរួមពិព័រណ៍នេះយើងអាចយើងអាចកាត់បន្ថយការជួសជុល និងការប្រើប្រាស់ឡើងវិញរួមទាំងភ្ជាប់ទំនាក់ទំនងជាមួយមនុស្ស ដែលមានគំនិតដូចគ្នា ដើម្បីគាំទ្រគ្នាក្នុងការធ្វើឱ្យមានការយល់ដឹងពីបរិស្ថានបន្ថែម»។
រីឯសហស្ថាបនិកស្នួខោអាវ កញ្ញា អេមី វន ដេស ក៏បានបន្ថែមដែរថា៖ «យើងនឹងនាំយករបស់របរ ដែលយើងមានបច្ចុប្បន្នបូករួមនឹងរបស់របរថ្មីៗដែលទើបបានជួសជុលទៅដាក់បង្ហាញ។ សូមចូលរួមគាំទ្របេសកកម្មសង្គមរបស់យើងហើយកុំភ្លេចយកសម្ភារ ដែលចង់បរិច្ចាគទៅផងដែរ! យើងនឹងជួបគ្នាឆាប់!»។
ពិព័រណ៍នេះមិនបានផ្ដោតរួមទៅលើប្លាស្ទិកនោះទេ តែវាជាការជំរុញចិត្តដែលអាចបង្ហាញមនុស្សពីច្រើនរបៀបជួសជុល កែច្នៃប្រើប្រាស់សម្ភារឡើងវិញ ជាជាងបោះវាចោល ឬក៏អាចឱ្យអ្នកដទៃប្រើប្រាស់បន្ត។
ដ្បិតថានេះជាពិព័រណ៍លើកដំបូងដែលពិបាកស្មានដឹងនូវលទ្ធផល តែអ្នកនាង សេនឌី ទទូចឱ្យប្រជាជនរួមគ្នាថែរក្សាបរិស្ថាន ព្រោះវាមិនត្រឹមតែជាបញ្ហាសំរាមនោះទេ វារឹតតែប៉ះពាល់ខ្លាំងទៅដល់សុខភាព។
សហគ្រិនសង្គមរូបនេះបានលើកឡើងថា៖ «យើងសង្ឃឹមថា ពិព័រណ៍លើកនេះជោគជ័យហើយបើយើងទទួលបានលទ្ធផលល្អ យើងនឹងរៀបចំវាឱ្យបាន ២ ដង ក្នុង ១ ឆ្នាំ»។
សម្រាប់ព័ត៌មានបន្ថែមក្នុងការចូលរួមជាមួយពិព័រណ៍ជួសជុល សូមតាមដាននៅក្នុងគេហទំព័រហ្វេសប៊ុក @onlyoneplanetkh៕