ភ្នំពេញ៖ ផ្សំភាពប្រណីតថ្លៃថ្នូរនៃគ្រឿងតាក់តែងកាយនៃសម័យកាលដ៏រុងរឿងក្នុងប្រវត្តិសាស្ត្រខ្មែរ ជាមួយនឹងការនិយមសហសម័យ បងប្អូនស្រីអ្នកនាង អ៊ីដូ និង អ៊ីយេន ចម បានប្រើប្រាស់ក្បូរក្បាច់រចនាខ្មែរច្នៃចេញជាគ្រឿងតាក់តែងកាយស្អាតប្លែកភ្នែកសម្រាប់អ្នកទីក្រុងទំនើប នៅទឹកដីសហរដ្ឋអាមេរិក។
ធំធាត់នៅតំបន់ប្រ៊ូកឃ្លីន នៃក្រុងញូវយ៉ក ស្ថាបនិកគ្រឿងអលង្ការ EdoEyen ដែលមានពូជពង្សាវតារឪពុកម្ដាយជាជនភៀសខ្លួនពីកម្ពុជាទៅរស់នៅអាមេរិកអំឡុងទសវត្សរ៍ ៨០ អ្នកទាំង ២ មានអារម្មណ៍ដិតដាមនឹងកេរដំណែលបេតិកភណ្ឌខ្មែរ ទាំងស្ថាបត្យកម្មអច្ឆរិយ ទម្រង់សិល្បៈរបាំ។ នេះបើយោងតាមការចុះផ្សាយរបស់វេបសាយហ្វាសសិន និងគ្រឿងអលង្ការ wwd.com។
ខណៈគ្រឿងតាក់តែងកាយបុរាណខ្មែរមានក្បាច់រចនាផ្ចិតផ្ចង់ឥតខ្ចោះ វាក៏មានទម្ងន់ធ្ងន់មិនអាចគ្រងជាគ្រឿងលម្អប្រចាំថ្ងៃទេ។ ជាទូទៅ អលង្ការទាំងនេះត្រូវបានគ្រងសម្រាប់តែពេលសម្ដែងសិល្បៈ។
បងប្អូនស្រីទាំង ២ បានលើកឡើងថា៖ «ក្រោយពីបានឃើញការសម្ដែងរបាំបុរាណខ្មែរតាំងពីក្មេងបានឃើញរបាំព្រះរាជទ្រព្យ ក្នុងខ្សែភាពយន្តសម័យដើម និងបានស្ដាប់ម្ដាយយើងនិទានពីរឿងព្រេងខ្មែរ យើងកាន់តែជាប់ចិត្តនឹងគ្រឿងអលង្ការគ្រងដោយក្សត្រ អប្សរា និងទេពមច្ឆា»។
ក្នុងសំណេររៀបរាប់នៅក្នុងវេបសាយ edoeyen.com អ្នកទាំង ២ បានរំឭកទៀតថា ខ្លួនតែងតែមានក្ដីស្រមៃចង់គ្រងគ្រឿងអលង្ការបុរាណដ៏អស្ចារ្យដូចតួអង្គក្នុងរឿងព្រេងនិទានខ្មែរ។ លុះដល់ពេលធំឡើង ក្ដីសុបិននេះនៅតែបន្តពុំសាបសូន្យឡើយ ធ្វើឱ្យបងប្អូន អ៊ីដូ និង អ៊ីយេន សម្រេចចិត្តប្រែក្លាយវាជាការពិត។
អ៊ីដូ ជាបងស្រីបានបញ្ចប់ការសិក្សាពីវិទ្យាស្ថានហ្វាសសិន និងបច្ចេកវិទ្យា ជំនាញជាអ្នកផ្សព្វផ្សាយ និងទីផ្សារ។ រីឯប្អូនស្រី អ៊ីយេន ពីមុនជាតារាម៉ូដែលអាជីពមុននឹងអ្នកទាំង ២ បង្កើតប្រ៊េនដ៍គ្រឿងអលង្ការនេះលក់អនឡាញកាលពីខែមិថុនា ឆ្នាំកន្លងទៅនេះ។
បងប្អូនស្រីទាំង ២ ក៏បានបង្កើតអលង្ការ edoeyen ក្នុងគោលបំណងឱ្យអ្នកដែលស្រឡាញ់ចូលចិត្តវប្បធម៌ខ្មែរ អាចទិញគ្រឿងលម្អកាយទាំងនេះយកទៅទុកប្រើប្រាស់ ដោយមានការច្នៃប្រឌិតបន្ថែមសម្របទៅតាមកាលៈទេសៈ និងម៉ូដសម័យទំនើប។
អ៊ីយេន ជាប្អូនស្រីបានប្រាប់វេបសាយ wwd.com ថា៖ «យើងចង់រចនាម៉ូដបែបកូនកាត់។ យើងចង់ថែរក្សានូវអ្វីដែលជាសិល្បៈវប្បធម៌ខ្មែរ ប៉ុន្តែបន្ថែមនូវភាពសាមញ្ញ និងទំនើបបន្តិច»។
អ្នកទាំង ២ បានសរសេរក្នុងវេបសាយគ្រឿងអលង្ការរបស់ខ្លួនថា៖ «ដើម្បីបញ្ចប់ការសាបរលាបនៃវប្បធម៌មួយដែលយើងដឹងថា វាចាំបាច់ក្នុងការថែរក្សាឱ្យគង់វង្សនោះ យើងត្រូវតែសម្រេចចិត្តបង្កើតគ្រឿងអលង្ការក្រោមការទទួលឥទ្ធិពលបុរាណខ្មែរ ដើម្បីផ្សារភ្ជាប់វាទៅនឹងជីវិតប្រចាំថ្ងៃបច្ចុប្បន្ន»។
ក្នុងវេបសាយ jckonline.com មកុដក្បាំង edoeyen ជម្រើសប្រាក់ លោហៈស្រោបមាស ឬមាសសុទ្ធមានតម្លៃពី ១ ៣៥០ ទៅ ៦០ ០០០ ដុល្លារ។
អ្នកទាំង ២ ក៏សង្ឃឹមផងដែរថា៖ «គ្រឿងអលង្ការរបស់យើងនឹងនាំមកនូវភាពពិសិដ្ឋ និងទាក់ទាញចំណាប់អារម្មណ៍ចំពោះបេតិកភណ្ឌយើង ហើយវានឹងត្រូវបានស្រឡាញ់ថែរក្សាឱ្យស្ថិតស្ថេរគង់វង្សយូរអង្វែងរហូតតទៅ»៕