.jpg)
ផលិតកម្ម Galaxy Navatra ប្រកាសរើសអ្នកនិពន្ធច្រៀង និងហ៊ានជូនកាដូរថយន្តម៉ាក Nx 200t ១គ្រឿង ឱ្យអ្នកនិពន្ធឆ្នើមប្រចាំឆ្នាំ។ លោក យឹម តាស្រង់ (រូបឈរ) អ្នកគ្រប់គ្រងទូទៅផលិតកម្ម Galaxy Navatra។ រូបថត ហ្វេសប៊ុក
ភ្នំពេញ៖ ខណៈចូលមកដល់ដើមឆ្នាំ ២០២១ ភ្លាម ស្រាប់តែផលិតកម្ម Galaxy Navatra បានចេញសេចក្តីជូនដំណឹងប្រកាសជ្រើសរើសអ្នកនិពន្ធទំនុកច្រៀង មេឡូឌី និងទំនុកភ្លេងជាច្រើននាក់ ហើយហ៊ានផ្តល់ជូនកាដូលើកទឹកចិត្តអ្នកនិពន្ធឆ្នើមប្រចាំឆ្នាំទៀតផងដែរនូវរថយន្តទំនើប ១ គ្រឿង ម៉ាកឡិចស៊ីស NX 200t។
បើតាមគេហទំព័រផលិតកម្ម Galaxy Navatra បង្ហោះសារថា៖ «គោរពជម្រាបសួរ ពុកម៉ែ បងប្អូន ទាំងអស់ ដើម្បីអភិវឌ្ឍសិល្បៈចម្រៀងសម័យ ប្រកួតប្រជែងទីផ្សារបរទេស Galaxy Navatra សូមលើកទឹកចិត្តផ្នែកនិពន្ធ ដែលតម្រូវទីផ្សារបរទេស។ នេះជាឱកាសដ៏ធំមួយសម្រាប់ក្មេងៗ និងយុវជន ដែលមានទេពកោសល្យផ្នែកនិពន្ធ ក្រុមហ៊ុនបានត្រៀមខ្លួនរួចជាស្រេចហើយ បង្កើត Galaxy Navatra International។ យើងខ្ញុំមានកិត្តិយសជម្រាបជូនបងប្អូនទាំងអស់គ្នាថា ក្រុមអ្នកនិពន្ធ ក្រៅក្រុមហ៊ុន ឬក្នុងក្រុមហ៊ុនពេញម៉ោងទាំងអស់ការនិពន្ធមេឡូឌី ទំនុកច្រៀង និងធ្វើភ្លេង ត្រូវទីផ្សារអន្តរជាតិ សម្រាប់អ្នកចូលទស្សនាច្រើនជាងគេប្រចាំឆ្នាំនឹងទទួលបានកាដូឡិចស៊ីស nx 200t ១ គ្រឿង ហើយក្លាយជាអ្នកនិពន្ធឆ្នើមទទួលពានប្រចាំឆ្នាំផងដែរ»។
ប្រភពដដែលបានបន្តឱ្យដឹងថា៖ «Galaxy Navatra ដើម្បីលើកកម្ពស់នូវស្នាដៃនិពន្ធចម្រៀងសម័យ ក្រុមហ៊ុនមានកិត្តិយសសូមជម្រាបជូនដំណឹងទិញយកស្នាដៃបទចម្រៀងថ្មីទាំងអស់ក្នុងតម្លៃ ១ បទចាប់ពី ៦០០ ដុល្លារ ដល់ ១ ៥០០ ដុល្លារ ឬប្រាក់ខែចាប់ពី ៥០០ ដុល្លារ ដល់ ៥ ០០០ ដុល្លារ តាមសមត្ថភាព។ ជ្រើសរើសអ្នកនិពន្ធចំនួន ៣០ នាក់ ហើយក្រុមអ្នកនិពន្ធបែងចែកជា ២។ ទី១.ធ្វើគិតបទ ១ បទចាប់ពី ៦០០ ដុល្លារ ដល់ ១ ៥០០ ដុល្លារ នេះសម្រាប់អ្នកលក់បទ ដែលធ្វើការក្រៅក្រុមហ៊ុន។ ទី២.ការងារបុគ្គលិកក្រុមហ៊ុនប្រាក់ខែចាប់ពី ៥០០ ដុល្លារ ដល់ ៥ ០០០ ដុល្លារ។ សូមបញ្ជាក់ថា ការងារទាំង ២ ប្រភេទនេះ មានឱកាសក្លាយជាអ្នកនិពន្ធឆ្នើមប្រចាំឆ្នាំដូចគ្នា ឱ្យតែមានបទចម្រៀងនៅក្រុមហ៊ុនយើងខ្ញុំ។ សូមទាក់ទងតាមទូរស័ព្ទ 093 840 155 /069 666 556 /017 891 939»។
ចំពោះលក្ខខណ្ឌលម្អិតស្តីពីលក្ខណៈរបស់អ្នកនិពន្ធក្តី ការតែងបទចម្រៀង មេឡូឌី និងទំនុកច្រៀងយ៉ាងណា ទើបអាចចូលរួមជាមួយ Galaxy Navatra នោះ មិនត្រូវបានគេដឹងឡើយ ខណៈ ភ្នំពេញ ប៉ុស្តិ៍ មិនទាន់អាចសុំបានការបកស្រាយបន្ថែមឡើយពីសំណាក់អ្នកគ្រប់គ្រងទូទៅរបស់ផលិតកម្ម។ ភ្នំពេញ ប៉ុស្តិ៍ បានទំនាក់ទំនងទៅលោក យឹម តាស្រង់ ជាអ្នកគ្រប់គ្រងទូទៅនៃផលិតកម្ម Galaxy Navatra បានលើកទូរស័ព្ទមួយភ្លែត ហើយឆ្លើយថា៖ «សុំអធ្យាស្រ័យបង ប្អូនជាប់រវល់ប្រជុំ ហើយចាំដល់ម៉ោង ៥ ឬ ៦ ល្ងាច ចាំប្អូនតេទៅខាងបងវិញ»៕
