ក្រុងញូវដែលី៖ ប៉ូលិសបានឱ្យដឹងពីថ្ងៃសៅរ៍ថា មាន់គក ១ ក្បាល ដែលបំពាក់ខ្នាយតក្នុងការប្រកួតមាន់ជល់ខុសច្បាប់មួយ ឯភាគខាងត្បូងឥណ្ឌាបានសម្លាប់ម្ចាស់វា នាំឱ្យមានការតាមរកអ្នករៀបចំសង្វៀនជល់មាន់។
មន្ដ្រីប៉ូលិសបានឱ្យដឹងថា បក្សីប្រយុទ្ធត្រូវបានបំពាក់ខ្នាយកាំបិតពិសេសនៅជើងម្ខាង សម្រាប់ការប្រកួតជាមួយគូសត្រូវ និងបានវាយចំក្រលៀនម្ចាស់ឱ្យរងរបួសធ្ងន់ ពេលវាព្យាយាមរើបម្រះ។
ប៉ូលិស ប៊ី ជេវ៉ាន់ បានប្រាប់ AFP ថា ជនរងគ្រោះបានស្លាប់ដោយសារបាត់បង់ឈាមច្រើនមុនពេលទៅដល់មន្ទីរពេទ្យក្នុងស្រុកការីមណាហ្គា នៃរដ្ឋតេឡានហ្គាណា។
លោក ជេវ៉ាន់ បានបន្ដថា បុរសរូបនោះ ស្ថិតក្នុងមនុស្ស ១៦ នាក់ ដែលរៀបចំការជល់មាន់ក្នុងភូមិឡូធូនូ ពេលហេតុការណ៍អកុសលបានកើតឡើង។ មាន់គកត្រូវបានឃាត់រក្សាទុកនៅប៉ុស្ដិ៍ប៉ូលិសមួយរយៈពេលខ្លី មុនពេលត្រូវបានបញ្ជូនទៅកាន់កសិដ្ឋាន ១ កន្លែង។
លោក ជេវ៉ាន់ បានឱ្យដឹងថា៖ «យើងកំពុងតាមស្វែងរកមនុស្ស ១៥ នាក់ទៀត ដែលពាក់ព័ន្ធនឹងការៀបចំសង្វៀនជល់មាន់ខុសច្បាប់»។
ពួកគេអាចប្រឈមបទចោទមនុស្សឃាត ល្បែងភ្នាល់ខុសច្បាប់ និងរៀបចំសង្វៀនជល់មាន់ខុសច្បាប់។
ការជល់មាន់ត្រូវបានហាមឃាត់ តែការបំពានជាទម្លាប់តាមភូមិឋានជនបទមួយចំនួន ជាពិសេសអំឡុងពេលបុណ្យសង្ក្រាន្តនៃព្រហ្មញ្ញសាសនា។
បក្សីប្រយុទ្ធបំពាក់ខ្នាយកាំបិតស្រួចប្រវែង ៧,៥ សង់ទីម៉ែត្រ នៅជើងម្ខាង ហើយអ្នកចូលរួមធ្វើការភ្នាល់គ្នាថា តើបក្សីមួយណាទទួលជ័យជម្នះក្នុងការប្រយុទ្ធស្លាប់រស់?
មាន់គករាប់ពាន់ក្បាលបានងាប់រៀងរាល់ឆ្នាំពីការប្រកួតនេះ បើទោះបីជាមានកិច្ចការខិតខំប្រឹងប្រែងពីក្រុមសិទ្ធិសត្វយ៉ាងណាក្ដី៕ AFP/HR