.jpg)
កញ្ញា ស៊ីន សេដ្ឋសុជ្ឈតា (ឆ្វេងទី២) ក្នុងសន្និសីទសារព័ត៌មាន កាលពីទី ១៤ ខែមករា នៅសណ្ឋាគារ Raffles Hotel Le Royal។ ហុង មិនា
ភ្នំពេញ៖ កញ្ញា ស៊ីន សេដ្ឋសុជ្ឈតា ចៅស្រីអធិរាជសំឡេងមាស ស៊ីន ស៊ីសាមុត បានសម្រេចចិត្តដើរលើវិថីសិល្បៈ និងចេញបទចម្រៀងរបស់ខ្លួនជាលើកដំបូងកាលពីថ្ងៃទី ១៤ ខែមករា បន្ទាប់ពីធ្វើការសម្រេចចិត្តយ៉ាងច្បាស់លាស់អស់ជាច្រើនឆ្នាំ។
តាមពិតទៅ នាឆ្នាំ ២០១៨ កញ្ញាវ័យ ២៧ ឆ្នាំ ធ្លាប់មានឱកាសបញ្ចេញទេពកោសល្យសំឡេងក្នុងចម្រៀងអមរឿងភាគខ្លីចំណងជើងថា «Music Magic Love»។ ក្នុងរឿងនោះដែរ កញ្ញាក៏បានជួយកែសម្រួលទំនុកច្រៀងចំនួន ៣ បទ ដែលត្រូវបាននិពន្ធរួចម្ដងមកហើយ។
នៅក្នុងឆ្នាំ ២០១៩ កញ្ញាក៏ត្រូវបានអញ្ជើញជាកិត្តិយសបកស្រាយឡើងវិញនូវបទ «ចម្ប៉ាបាត់ដំបង» ក្នុងខ្សែភាពយន្តរឿង «តន្ត្រីជីវិត» ជាភាពយន្តត្រូវជ្រើសរើសចូលរួមប្រកួតពានរង្វាន់អូស្ការលើកទី៩២ ផ្នែកភាពយន្តភាសាបរទេស រួមទាំងមានវណ្ណកម្មជាច្រើនទៀត ដែលកញ្ញាត្រូវបានអញ្ជើញឱ្យច្រៀង។
ទោះជាមានបទពិសោធលើវិថីតន្ត្រីគួរសមដែរ តែកញ្ញាមិនធ្លាប់ហៅខ្លួនឯងថាជាសិល្បករទេ ទាំងមិនមានបំណងចាប់យកចម្រៀងអាជីពដែរ។
វាអាចថាជារឿងគួរឱ្យអស់សំណើចមួយ ដោយតាំងពីជីតាតរហូតមកដល់ឪពុកម្តាយ និងបងប្រុស ពួកគាត់សុទ្ធតែជាសិល្បករ តែកញ្ញាបែរជារួញរាក្នុងការបន្តនូវសាវតានេះ។
ហេតុផលចម្បងត្រូវបានកញ្ញាប្រាប់ថា ដោយសារឃើញសម័យឪពុកអ្នកសិល្បៈ គេមិនសូវឱ្យតម្លៃ ហើយវិថីនេះក៏មិនមែនងាយស្រួលនោះដែរ។
ក្នុងការប្រកាសខ្លួនឯងជាសិល្បករថ្ងៃដំបូង កញ្ញាបានរៀបរាប់ពីអារម្មណ៍ផ្ទាល់ខ្លួនប្រាប់មកកាន់ ភ្នំពេញ ប៉ុស្តិ៍ ថា៖ «បន្ទាប់ពីការស្លាប់របស់ឪពុក និងបងប្រុសខ្ញុំយល់ថា ខ្ញុំគួរតែបន្តកេរដំណែលគ្រួសារខ្ញុំ»។
កញ្ញារៀបរាប់ទៀតថា៖ «និយាយតាមត្រង់ការសម្រេចចិត្តប្រឡូកក្នុងសិល្បៈនេះខ្ញុំក៏ភ័យដែរ ខ្ញុំមិនដឹងថាគម្រោង ដែលខ្ញុំធ្វើនឹងមានការគាំទ្រពីទស្សនិកជនដោយរបៀបណាទេ ព្រោះនេះជាជំហានដំបូងរបស់ខ្ញុំ»។
ដំណើរលើវិថីសិល្បៈនេះ សុជ្ឈតា បានប្រាប់ថា កញ្ញាមិនចង់ឱ្យទស្សនិកជនស្គាល់កញ្ញាក្រោមស្រមោលរបស់លោកតាទេ។
កញ្ញាចង់ឱ្យបងប្អូនអ្នកគាំទ្រយល់ឱ្យច្បាស់ថា កញ្ញាមិនមែនចង់គេចពីគ្រួសារនេះទេ។ កញ្ញាគ្រាន់តែមិនចង់ឱ្យមានការប្រៀបធៀបប៉ុណ្ណោះ។
កញ្ញាបញ្ជាក់ថា៖ «កន្លងមកខ្ញុំតែងឮគេសួរហេតុអ្វីសំឡេងកូនមិនដូចឪពុក ចៅមិនដូចជីតា។ នាងខ្ញុំចង់ចាកចេញពីកន្លែងហ្នឹង នាងខ្ញុំចង់ឱ្យទស្សនិកជនស្គាល់នាងខ្ញុំជានាងខ្ញុំ។ គោលដៅរបស់ខ្ញុំ គឺខ្ញុំទុកភាពជាខ្លួនឯងសម្រាប់ខ្លួនឯង ធ្វើអ្វីជាខ្លួនឯង ធ្វើសិល្បៈដែលជាខ្លួនឯង»។
ធំដឹងក្ដីក្នុងបរិយាកាសតន្ត្រីដែលនាងតែងតែទៅតាមឪពុកលោក ស៊ីន ច័ន្ទឆាយា ពេលទៅច្រៀងតាមភោជនីយដ្ឋាន និងរង្គសាលនានា កាលពីនៅក្មេង។ ពេលនេះកញ្ញាអាចនិពន្ធបទចម្រៀងសម្រាប់វត្តមានជាសិល្បករថ្ងៃដំបូង បានយ៉ាងល្អក្នុងផលិតកម្មក្លាបយ៉ាហែន (KlapYaHandz)។
កញ្ញា សុជ្ឈតា អាយុ ២៧ ឆ្នាំ ទើបតែសម្ពោធចម្រៀង៣បទរបស់នាង។ ហុង មិនា
កញ្ញា សុជ្ឈតា បានចេញចម្រៀង ៣ បទ ដែលបទទី១ មានចំណងជើងថា «ទទួលស្គាល់ការពិត» ជាបទបែបភ្លេងមនោសញ្ចេតនា និងបទទី២ កញ្ញាថា មិនទាន់ចង់បង្ហាញចំណងជើងនៅឡើយទេ។
កញ្ញាបានបង្ហើបឱ្យដឹងថា៖ «ក្នុងចំណោម ៣ បទ មាន ១ ជាភាសាអង់គ្លេស និងចង្វាក់វាមួយៗផ្សេងគ្នា តែបទទាំង ៣ សុទ្ធសឹងតែនិយាយពីបទពិសោធជីវិតខ្ញុំផ្ទាល់»។
កាលពីនៅក្មេងកញ្ញាចូលចិត្តស្ដាប់បទភាសាអង់គ្លេសជាច្រើន ជាហេតុនាំឱ្យខ្លួនចង់សាកល្បងសមត្ថភាព និងជ្រើសរើសការនិពន្ធជាភាសាអង់គ្លេស។
កញ្ញាបានឱ្យដឹងដែរថា៖ «សម្រាប់ខ្ញុំភាសាជាតិនៅតែសំខាន់ ព្រោះខ្ញុំចង់ចែករំលែកសារដែលខ្ញុំមានទៅដល់ប្រជាជនខ្មែរ ប៉ុន្តែដោយឡែកចម្រៀងជាភាសាបរទេស ខ្ញុំគិតថាវាជាជំហានបន្ទាប់ទៀត ដែលខ្ញុំក៏ដូចជាសិល្បករ សិល្ប-ការិនីយើងផ្សេងទៀតបានឈានទៅកាន់ទីផ្សារបរទេសមិនមែនតែក្នុងស្រុកទេ»។
កញ្ញាមិនចង់ចេញចម្រៀងច្រើនពេកទេ សម្រាប់ដើមឆ្នាំ ២០២១ ប៉ុន្តែកញ្ញា សុជ្ឈតា នៅតែបន្តតែងនិពន្ធជាបណ្ដើរៗថែមទៀត។
កញ្ញាធ្វើទៅតាមសមត្ថភាពដោយសារការសរសេរការតាក់តែង គឺត្រូវការប្រើអារម្មណ៍ និងដាក់មនោសញ្ចេតនា ដែលមិនអាចបង្ខំបាន។
មួយវិញទៀតកញ្ញាក៏ចង់អរគុណដល់ ក្លាបយ៉ាហែន អ្នកគ្រប់គ្រង សុខ វិសាល ដែលតែងតែឱ្យសិល្បករគ្រប់រូបធ្វើអ្វីដែលខ្លួនស្រឡាញ់ និងគ្មានការដាក់សម្ពាធអ្វីទាំងអស់។
កញ្ញា សុជ្ឈតា និយាយថា៖ «ខ្ញុំអរគុណដែល ក្លាបយ៉ាហែន បានបើកសិទ្ធិនៅក្នុងការសម្រេចចិត្តដល់សិល្បករ-សិល្បការនីគ្រប់រូបឱ្យធ្វើអ្វីដែលពួកយើងស្រឡាញ់កន្លែងហ្នឹងហើយដែលធ្វើឱ្យខ្ញុំគ្មានអារម្មណ៍ថាមានសម្ពាធ ហើយសូមបញ្ជាក់ថា មិនមែនខ្ញុំធ្វើការឱ្យគាត់ទេ យើងធ្វើការជាមួយគ្នា ដើម្បីធ្វើឱ្យវិស័យសិល្បៈដើរទៅមុខទាំងអស់គ្នា»។
បទ «ទទួលស្គាល់ការពិត» នឹងចេញជាវីដេអូចម្រៀងផ្លូវការនៅថ្ងៃទី ៨ ខែកុម្ភៈខាងមុខនេះ។ ទស្សនិកជនដែលរងចាំទស្សនា និងស្ដាប់ចម្រៀងរបស់ សុជ្ឈតា អាចតាមដាននៅក្នុងទំព័រហ្វេសប៊ុករបស់ក្លាបយ៉ាហែន @KlapYaHandzMusic sic៕
