.jpg)
ភ្ញៀវទេសចរដែលចាក់វ៉ាក់សាំង នឹងត្រូវបានរួចពីដំណាក់កាលចត្តាឡីស័ក។ រូបថត AFP
ក្រុងបាងកក៖ កាលពីថ្ងៃសុក្រ ប្រទេសថៃ បានប្រកាសផែនការពិសោធន៍មិនបាច់ធ្វើចត្ដាឡីស័កសម្រាប់គោលដៅទេសចរណ៍ដ៏ពេញនិយមបំផុតមួយនៅដែនកោះភូកេត ខណៈប្រទេសនេះមានបំណងស្ដារសេដ្ឋកិច្ចជាតិដែលញាំញីដោយវិបត្ដិកូវីដ ១៩ ឡើងវិញ។
ថៃបានដាក់វិធានការយ៉ាងតឹងរ៊ឹងលើដំណើរមកដល់របស់ភ្ញៀវ ដើម្បីទប់ស្កាត់ការរីករាលដាល តែវាក៏បានបង្អាក់វិស័យទេសចរណ៍ ជាចលករសំខាន់ចំពោះវិស័យទេសចរណ៍ ដែលប៉ះពាល់ធ្ងន់ធ្ងរបំផុតលើសវិបត្ដិសេដ្ឋកិច្ចឆ្នាំ ១៩៩៧ ទៅទៀត។
ផលប៉ះពាល់បានជះឥទ្ធិពលដល់វិស័យផ្សេងៗទៀតទូទាំងប្រទេស រួមទាំងឧស្សាហកម្មកម្សាន្ដ លក់រាយ សណ្ឋាគារ និងភោជនីយដ្ឋាន។
មន្ដ្រីទេសចរណ៍ថៃ បានប្រកាសកាលពីថ្ងៃសុក្រថា ភូកេតដែលល្បីល្បាញជាឆ្នេរស្អាត និងទឹកសមុទ្រដូចត្បូងកណ្ដៀង នឹងត្រូវបានប្រើជាគោលដៅទេសចរណ៍សាកល្បង។ ភ្ញៀវទេសចរដែលបានចាក់វ៉ាក់សាំងហើយនឹងត្រូវបានរួចពីដំណាក់កាលចត្ដាឡីស័កនៅសណ្ឋាគារ។
យន្តហោះឆ្ពោះមកកាន់កោះភូកេត ប្រទេសថៃ។ រូបថត AFP
យូថាសាក សូផាសន ប្រធានអាជ្ញាធរទេសចរណ៍ថៃបានឱ្យដឹងថា «គំរូទេសចរណ៍ភូកេតវិសេស» នឹងចាប់ផ្ដើមអំឡុងខែកក្កដាតទៅ។
ទេសចរបរទេសនឹងតម្រូវឱ្យចាក់វ៉ាក់សាំង ២ ដូស វិញ្ញាបនបត្របញ្ជាក់ការធ្វើតេស្ដអវិជ្ជមាន និងដោនឡូតកម្មវិធីទូរស័ព្ទចំពោះការតាមដាន។
យូថាសាក ក៏បានអះអាងថា ទីក្រុងទេសចរណ៍ចំនួន ៦ នឹងធ្វើការកាត់បន្ថយពេលវេលាធ្វើចត្ដាឡីស័កចំពោះអ្នកដំណើរចាក់វ៉ាក់សាំងរួចនៅខែក្រោយ រួមទាំងរីសតឆ្នេរក្រាប៊ីសាមុយ និងផាតាយ៉ា។
ភ្ញៀវនឹងធ្វើចត្ដាឡីស័ក ៧ ថ្ងៃ ហើយនឹងអនុញ្ញាតឱ្យដើរហើរនៅបរិវេណសណ្ឋាគារ ជាអ្វីដែលមានការផ្លាស់ប្ដូរសម្រាប់ភ្ញៀវបច្ចុប្បន្ន ដែលធ្លាប់តែតម្រូវឱ្យសម្ងំនៅក្នុងបន្ទប់រយៈពេល ២ សប្ដាហ៍។
ផែនការនេះនៅរង់ចាំការសម្រេចចុងក្រោយពីរដ្ឋាភិបាល។
ទេសចរប្រមាណ ៤០ លាននាក់រំពឹងថា នឹងមកលេងថៃក្នុងឆ្នាំ ២០២០ តែជាក់ស្ដែងមានតែ ៦,៧ លាននាក់ប៉ុណ្ណោះ។ នេះបើយោងតាមទិន្នន័យពីក្រសួងទេសចរណ៍ និងកីឡា។
វិធានការរឹតបន្ដឹងខ្លាំងរបស់ថៃអាចជួយទប់ទល់នឹងអត្រាឆ្លងខ្ពស់ ដោយប្រទេសមួយនេះមានឆ្លងជំងឺកូវីដ ១៩ ប្រមាណ ២៨ ៥០០ នាក់ លើចំនួនប្រជាជនសរុប ៧០ លាននាក់៕ AFP/HR
