ក្រុងប៉ារីស៖ ការរឹតបន្ដឹងការរីករាលដាលជំងឺកូវីដ ១៩ ដោយជោគជ័យអាចធ្វើឱ្យពលរដ្ឋក្នុងប្រទេសបារាំង ក៏ដូចបណ្ដាប្រទេសដទៃ ទទួលនូវរសជាតិម្ហូបថ្មីៗចំពោះការចម្អិនអាហារនៅតាមផ្ទះ តែមុខម្ហូបមួយប្រភេទដែលកំពុងពេញនិយម ហើយទទួលរងគ្រោះពីកូវីដផងនោះ គឺខ្យង។
ការចម្អិនខ្យងជាមួយប៊័រខ្ទឹមស គឺជាមុខម្ហូបប្រពៃណីរបស់បារាំង ដែលរមែងបង្កើតបានជាចំណូលចិត្ដ និងការខ្ពើមរអើមសម្រាប់ភ្ញៀវទេសចរ ជាពិសេសពលរដ្ឋអង់គ្លេស ដែលតែងតែញញើតនឹងបរិភោគសត្វល្អិតមានសម្បក និងសម្បូររំអិលនេះ។
ប៉ុន្ដែដោយសារភោជនីយដ្ឋាននានានៅតែបន្ដបិទទ្វាររយៈពេលជាច្រើនសប្ដាហ៍ ខណៈបារាំងកំពុងប្រយុទ្ធប្រឆាំងនឹងជំងឺឆ្លង ម្ចាស់កសិដ្ឋានចិញ្ចឹមខ្យង ក៏បារម្ភចំពោះអនាគតរបស់ខ្លួនផងដែរ។
កសិករម្នាក់ឈ្មោះ ហេវ មេនេឡត បានប្រាប់ AFP ថា៖ «ក្នុងឆ្នាំ ២០២០ ការលក់បានធ្លាក់ចុះ ៣៣ ភាគរយ ដែលលើសពីការរំពឹងទុក»។ លោកមិនបានទទួលប្រាក់ចំណូលចាប់ពីខែមិថុនា ដល់ខែតុលា ឆ្នាំ ២០២០ និងរស់ដោយសារលុយសន្សំប៉ុណ្ណោះ។
លោកបន្ដថា៖ «ឆ្នាំនេះ ក៏មិនខុសគ្នាដែរ។ ខ្ញុំគ្មានអ្នកបញ្ជាទិញ គ្មានទីផ្សារ និងគ្មានហាងកុម្ម៉ង់នោះទេ»។ លោកបារម្ភថា លោកប្រហែលជាត្រូវបិទអាជីវកម្មហើយ។
កសិករម្នាក់ទៀត អូលីវីយ័រ ដាដ បានប្រាប់ AFP ថា អាជីវកម្មបានជួបបញ្ហាខ្លាំងក្នុងឆ្នាំ ២០២០។ លោក ដាដ ត្រូវបានបង្ខំចិត្ដរកការងារធ្វើជាមួយក្រុមប្រឹក្សាមូលដ្ឋាន ដើម្បីផ្គត់ផ្គង់ជីវភាពគ្រួសារ។
កសិករចិញ្ចឹមខ្យង បានទទួលជំនួយតិចតួចពីរដ្ឋ ខណៈឧស្សាហកម្មខ្យងបារាំងបានទ្រទ្រង់ដល់ប្រជាកសិកររាប់រយនាក់ ដែលកំពុងតស៊ូជាមួយផលិតផលនាំចូលពីអឺរ៉ុបខាងកើតមានតម្លៃថោក៕ AFP/HR