.jpg)
កញ្ញា សុគា គីមលាង និងតួប្រុស នាពេលថតកុនដំបូងរឿង «ព្រះភិក្ខុពនេចរ»។ រូបថត សហការី
ភ្នំពេញ៖ នៅទីបំផុតតារាស្រីដែលជានាដកា រូបសម្រស់ស្រស់ស្អាត សាច់សខ្ចី រូបរាងខ្ពស់សមសួន កញ្ញា សុគា គីមលាង បានថតកុនដំបូងរបស់ខ្លួន ដែលជាក្តីប្រាថ្នាទទួលថតតែកុនបែបបុរាណនោះហើយ តាមរយៈការថតកុនភាគបុរាណបែបព្រះពុទ្ធសាសនារឿង «ព្រះភិក្ខុពនេចរ» ដែលមានអត្ថន័យខ្លឹមសារល្អ ឆ្លុះបញ្ចាំងតថភាពសង្គមស្ទើរគ្រប់រសជាតិនៃឆាកជីវិតទាំងមនុស្ស និងសត្វ នាសម័យកាលលង្វែក ដោយផលិតកម្មនៃអង្គការសកម្មភាពសិល្បៈខ្មែរ (KAA)។
តារាស្រីដែលច្រើនតែលេចមុខក្នុងការថតស្ប៉តផ្សព្វផ្សាយពាណិជ្ជកម្ម ឬថតសម្អាងការ ដែលជាគោលជំហរផ្ទាល់ខ្លួន និងស្របតាមចំណូលចិត្តគ្រួសារ មិនប្រាថ្នាការថតកុនបែបសម័យ ដោយនាដកា ធ្លាប់មានភាពល្បីក្នុងការសម្តែងជាតួទេពធីតាសង្ក្រាន្តឆ្នាំ ២០១៨ មកនោះបានបង្ហើបឱ្យដឹងថា៖ «ទោះបីជាក្នុងកាលៈទេសៈណាក៏ដោយ ការតាំងចិត្តទទួលថតកុនបែបបុរាណសម្រាប់នាងខ្ញុំមិនប្រែប្រួលឡើយ ព្រោះជាចំណូលចិត្តស្រឡាញ់ការថតកុនបែបនេះ ខណៈខ្ញុំយល់ថា កុនសម័យនោះ គឺមានច្រើនស្រាប់ហើយ។ តទៅថ្ងៃមុខ ក៏នាងខ្ញុំនៅតែចង់ថតកុន បែបបុរាណមានលក្ខណៈបង្ហាញពីវប្បធម៌ និងប្រវត្តិសាស្ត្រតែប៉ុណ្ណោះ។ នាងខ្ញុំយល់ថា ការថតកុនប្រភេទនេះ មានសារៈសំខាន់ផ្នែកវប្បធម៌ ហើយពេលថ្ងៃក្រោយអាចបន្សល់ទុកជាស្នាដៃរបស់ខ្លួនសម្រាប់កូនចៅជំនាន់ក្រោយ»។
តារាស្រីវ័យ ២២ ឆ្នាំ ជានាដការៀនចប់ជំនាញរបាំបុរាណនៅសាលាមធ្យមវិចិត្រសិល្បៈកញ្ញា សុគា គីមលាង បន្តឱ្យដឹងពីការថតកុនភាគរឿង «ព្រះភិក្ខុពនេចរ» ដែលជាកុនភាគបុរាណដំបូងខ្លួនបានថតនេះថា៖ «សម្រាប់កុននោះ តួខ្ញុំមានថតតែពី ២ ភាគ តែប៉ុណ្ណោះក្នុងចំណោមជាង ២០ ភាគ ព្រោះរឿងនេះ ភាគច្រើនមានឈុតសម្តែងរបស់តួប្រុសជាសង្ឃ»។
គួរបញ្ជាក់ដែរថា ភាពយន្តភាគរឿង «ព្រះពនេចរ» ជាប្រភេទរឿងភាពយន្តបែបអប់រំទៅតាមធម៌ព្រះពុទ្ធ មានឥទ្ធិពលព្រះពុទ្ធសាសនានៃសង្គមបរិយាកាសក្នុងសម័យកាលលង្វែកកាលកំណត់តែងឆ្នាំ ១៩៦៥ នៃសៀវភៅរឿង «ព្រះពនេចរ» របស់អ្នកនិពន្ធលោកសាស្ត្រាចារ្យ ឱម ណាគ្រី ផលិតករប្រតិបត្តិ ព្រះភិក្ខុវជិរប្បញ្ញោ គូ សុភាព អ្នកនិពន្ធអត្ថបទភាពយន្ត បូ សុគន្ធា ដឹកនាំសម្តែងដោយលោក សួង សុភ័ក្រ ជំនួយការដឹកនាំដោយ Preeka ផ្នែករូបភាព វន បូរិន្ទ៕
