ភ្នំពេញ៖ ភាពយន្ដខ្នាតខ្លីរឿង «ទូទឹកកកវេទមន្ដ» ឬ (Refrigerate After Opening) រយៈពេល ៦ នាទី ដែលដឹកនាំ និងនិពន្ធដោយផលិតករកូនកាត់ខ្មែរ-អាមេរិកកាំង បានឈ្នះពានរង្វាន់ជម្រើសមហាជននៅសាកលវិទ្យាល័យកាលីហ្វ័រនីញ៉ាខាងត្បូង (USC) ជាសាលាបង្រៀនភាពយន្ដកំពូលមួយក្នុងលោក។
ភាពយន្ដខ្នាតខ្លីរៀបរាប់អំពីបុរសម្នាក់ ដែលជួបបទពិសោធលំបាកក្នុងជីវិត និងបានស្វែងរកដំណោះស្រាយក្នុងការផ្លាស់ប្ដូរជីវិតតាមរយៈទូទឹកកក ១ គ្រឿង។
ពីអ្វីដែលបុគ្គលម្នាក់ៗរមែងជួបប្រទះក្នុងឆាកជីវិត «ទូទឹកកកវេទមន្ដ» គឺជាដំណោះស្រាយមួយ។ វាជាដំណោះស្រាយនូវអ្វីដែលលោក ខេវីន អ៊ុង បានជួបប្រទះចំពោះខ្លួនឯង ក៏ដូចជាមនុស្សជាច្រើនទៀត ដែលលោកបានដឹង។
លោក ខេវីន ដែលគ្រួសារលោកជាជនភៀសខ្លួនរត់គេចពីសម័យសង្គ្រាមខ្មែរក្រហមបាននិយាយថា៖ «មនុស្សជាច្រើនអត់មានរបស់សល់ចោលរៀងរាល់ថ្ងៃនោះទេ។ វាជាសិទ្ធិបុគ្គល ដែលពួកគេអាចធ្វើបែបនោះបាន។ ប៉ុន្ដែចុះបើវេទមន្ដពិតជាមាន លោកអ្នកអាចផ្លាស់ប្ដូរបញ្ហានេះបានឬទេ? ចុះតើវាយ៉ាងដូចម្ដេច បើលោកអ្នកត្រូវបានផ្ដល់ឧបករណ៍មួយ ដើម្បីផ្លាស់ប្ដូរជីវិត?»។
រីច សម្ដែងដោយលោក តូនី ស៊ូរីយ៉ាណូ អាយុខ្ទង់ ៣០ ឆ្នាំ ដែលត្រូវបានផ្ដល់ឱកាសជីវិតថ្មីក្រោយទទួលបានទូទឹកកកវេទមន្ដមួយ។ ប៉ុន្ដែអ្វីដែលគួរឱ្យពិចារណានោះគឺ ដោយសារទូទឹកកកផ្ដល់ជាតម្រុយឱ្យលោក វាមិនបង្ខំរូបលោកឱ្យធ្វើអ្វីមួយឡើយ។
លោក ខេវីន អ៊ុង បានប្រាប់ ភ្នំពេញ ប៉ុស្ដិ៍ ថា៖ «ទូទឹកកកនេះជាវត្ថុវេទមន្ដ និងផ្ដល់ឱ្យ រីច នូវអ្វីៗគ្រប់យ៉ាងដែលអាចជួយឱ្យបុរសរូបនេះនូវការផ្លាស់ប្ដូរជីវិត តែវាសម្រេចតែលើរូបលោកផ្ទាល់។ របស់របរពីទូទឹកកកនោះមិនមែនជាវត្ថុវេទមន្ដនោះទេ»។
គំនិតនៃការផលិតភាពយន្ដខ្នាតខ្លីនេះកើតឡើងក្នុងពេលសិក្សាសរសេរសំណេរនិពន្ធនៅ USC ជាទីដែលលោក ខេវីន កំពុងតែបញ្ចប់ថ្នាក់បរិញ្ញាបត្រជាន់ខ្ពស់វិចិត្រសិល្បៈនៅក្នុងវិស័យភាពយន្ដ និងផលិតកម្មវិធីទូរទស្សន៍។
លោកបានបន្ដថា៖ «ខ្ញុំចង់បង្ហាញអំពីដំណើររឿងដែលបញ្ចូលទាំងសាច់រឿងប្រឌិតក្នុងសភាពពិត តែខ្ញុំក៏មិនចង់ធ្វើឱ្យមានភាពអស្ចារ្យហួសហេតុពេកនោះដែរ។ ខ្ញុំចង់ផលិតរឿងដែលទាក់ទងនឹងជីវិតប្រចាំថ្ងៃរបស់យើង។ នេះជាមូលហេតុដែលខ្ញុំប្រើប្រាស់សម្ភារផ្ទះបាយសាមញ្ញ ជាតួអង្គសំខាន់មួយ។ វាគឺជាអ្វីដែលយើងមាននៅគ្រប់ផ្ទះ ហើយជាអ្វីដែលយើងមិនសូវគិតគូរពីវា»។
លោក ខេវីន ដែលប្រសូតនៅរដ្ឋកាលីហ្វ័រនីញ៉ា សហរដ្ឋអាមេរិក ខណៈម្ដាយជាអ្នកខេត្ដបាត់ដំបង និងឪពុកមកពីកំពង់ចាម ស្ថិតនៅក្នុងនិស្សិតបញ្ចប់ការសិក្សាម្នាក់ចំណោមនិស្សិតតិចតួច ដែលត្រូវបានជ្រើសរើសចូលរៀនកម្មវិធីបណ្ដុះបណ្ដាល Star Trek Command Training Programme ឆ្នាំ ២០២០ ជាវគ្គសិក្សាផ្ដល់ជំនាញដល់និស្សិតទើបបញ្ចប់ការសិក្សា។
Refrigerate After Opening ត្រូវបានដាក់បញ្ចាំងនៅមហោស្រពភាពយន្ដនៃសមាគមអតីតនិស្សិតមកពីតំបន់អាស៊ីប៉ាស៊ីហ្វិកប្រចាំនៅក្នុងសាកលវិទ្យាល័យ USC ដែលមានផលិតករ ចូន ឆូ ជាភ្ញៀវកិត្ដិយស។
លោក ខេវីន បាននិយាយថា USC ជាសាកលវិទ្យាល័យភាពយន្ដកំពូលនៅក្នុងលោក ហើយមហោស្រពដាក់បញ្ចាំងភាពយន្ដល្អៗ ដែលផលិតឡើងដោយនិស្សិតមកពីតំបន់អាស៊ីរបស់ USC។
មហាជនជាអ្នកជ្រើសរើសភាពយន្ដណាដែលខ្លួនចូលចិត្ដនៅក្នុងចំណោមភាពយន្ដដាក់បញ្ចាំងទាំងនោះ ហើយរឿង Refrigerate After Opening បានឈ្នះពាន Audience Choice Award។
លោកនិយាយថា ភាពយន្ដនេះកំពុងត្រូវបានដាក់បញ្ចាំងនៅតាមមហោស្រពនានា ដូចជា មហោស្រព DisOrient Film Festival ចាប់ពីថ្ងៃទី ១៩ ដល់ ២១ ខែមីនា New Haven International Film Festival ចាប់ពីថ្ងៃទី ១២ ដល់ទី ១៥ ខែឧសភា និង UK Asian Film Festival ចាប់ពីថ្ងៃទី ២៦ ខែឧសភា ដល់ថ្ងៃទី ៦ ខែមិថុនា។
លោកបន្ដថា៖ «រឿងនេះនឹងមានការដាក់បញ្ចាំងនៅតាមមហោស្រពជាច្រើន ហើយនឹងមានការចែកចាយទៅតាមដៃគូផ្សេងទៀត»។
លោកក៏អរគុណដល់អ្នកដែលបានទស្សនាភាពយន្ដរបស់លោក និងបានគាំទ្រលោកអស់រយៈពេលជាច្រើនឆ្នាំ។ ក្នុងនាមជាផលិតករកូនកាត់ខ្មែរ-អាមេរិកាំងម្នាក់នៅហូលីវូដ លោកសង្ឃឹមថា លោកអាចផលិតភាពយន្ដតំណាងឱ្យជាតិខ្មែរ និងរឿងរ៉ាវជាច្រើនទៀតអំពីខ្មែរផងដែរ។
លោកបានលើកឡើងថា៖ «ខណៈឧស្សាហកម្មនេះកំពុងតែមានការផ្លាស់ប្ដូរ ហើយលោកអ្នកមានទំនោរមើល រឿងអាស៊ីច្រើន ពលរដ្ឋកម្ពុជានៅមិនទាន់ត្រូវបានគេលើកយកមកនិយាយ និងមិនមានវត្ដមាននៅលើឆាកអន្ដរជាតិនោះទេ»។
លោកបន្ថែមថា៖ «ខ្ញុំសង្ឃឹមថា ថ្ងៃណាមួយ ខ្ញុំខ្លួនឯង និងផលិតករខ្មែរដទៃទៀតនឹងបង្ហាញពិភពលោកថា យើងមានភាពយន្ដល្អៗជាច្រើនដែលនឹងត្រូវបានផលិតឡើង»។
សម្រាប់ព័ត៌មានបន្ថែម សូមចូលទៅកាន់វេបសាយរបស់លោក https://www.kevinung.film/៕