.jpg)
លោកវេជ្ជបណ្ឌិត គួច ម៉េងលី សម្ពោធស្នាដៃនិពន្ធលើកទី៨ សៀវភៅជាង ៣០០ ទំព័រ ឈ្មោះ«កម្រងកំណាព្យពីដួងចិត្ត»។ ហ៊ាន រង្សី
ភ្នំពេញ៖ ដោយមានគោលបំណងចង់បញ្ជ្រាបចំណេះដឹងអប់រំ ទូន្មាន ប្រៀនប្រដៅផ្លូវចិត្ត លើកទឹកចិត្ត ការប្រកបការងារ ការធ្វើអាជីវកម្ម ភាពជាអ្នកដឹកនាំ គុណតម្លៃនៃការរៀបចំអភិវឌ្ឍខ្លួនឱ្យក្លាយជាបុគ្គលិកឆ្នើម ជាពិសេសចង់ឱ្យយុវជនខ្មែរជំនាន់ក្រោយ ងាកមកយល់ដឹងពីតម្លៃនៃអក្សរសាស្រ្តខ្មែរតាមរយៈសិល្បៈតែងនិពន្ធកំណាព្យឡើងវិញនោះ ទើបអ្នកនិពន្ធ ចងក្រងសៀវភៅមួយដែលមានចំណងជើងថា «កម្រងកំណាព្យពីដួងចិត្ត» ដែលបានបើកសម្ពោធកាលពីថ្ងៃទី ២៥ ខែ មករា ឆ្នាំ ២០២១។
សៀវភៅ «កម្រងកំណាព្យពីដួងចិត្ត» នេះគឺជាវណ្ណកម្មទី៨ ហើយសម្រាប់សមិទ្ធផលនៃការនិពន្ធសៀវភៅរបស់ឧកញ៉ា វេជ្ជបណ្ឌិត គួច ម៉េងលី បានសម្ពោធផ្លូវការ នៅឯបណ្ណាគារលក់សៀវភៅ ម៉ូនូមែនប៊ុក ដែលមានអ្នកចូលរួមយ៉ាងច្រើនកុះករ ខណៈស្នាដៃលើកនេះគឺជាកម្រងកំណាព្យដែលខុសប្លែកពីលើកមុនជាស្នាដៃពាក្យរាយ។
ហ៊ាន រង្សី
ថ្លែងនៅក្នុងពិធីសម្ពោធសៀវភៅកាលពីថ្ងៃចន្ទ ទី ២៥ ខែ មករា ឆ្នាំ ២០២១ កន្លងមកនោះ ឧកញ៉ា វេជ្ជបណ្ឌិត គួច ម៉េងលី មានប្រសាសន៍ថា៖ «ការតែងនិពន្ធសៀវភៅនេះឡើងក្នុងគោលបំណង ដើម្បីបញ្ជ្រាបចំណេះដឹងអប់រំ ទូន្មាន ប្រៀនប្រដៅផ្លូវចិត្ត ការលើកទឹកចិត្ត ការប្រកបការងារ ការធ្វើអាជីវកម្ម ភាពជាអ្នកដឹកនាំ គុណតម្លៃនៃការរៀបចំអភិវឌ្ឍជាបុគ្គលិកឆ្នើម ព្រមទាំងបណ្ដុំនូវចំណេះដឹងផ្សេងៗជាច្រើនទៀត ជាពិសេសផ្នែកវិធីសាស្រ្តតែងកំណាព្យដែលជាតម្លៃនៃអក្សរសាស្រ្តជាតិខ្មែរ»។
រាល់ការបោះពុម្ពសៀវភៅទាំងនេះ គឺទទួលថវិកា មកវិញបានត្រឹមតែ ៣០ ភាគរយប៉ុណ្ណោះ ហើយថវិកាទាំងអស់ ដែលបានពីការលក់សៀវភៅនឹងបង្វិលចូលទៅមូលនិធិម៉េងលី ជេ. គួច ដែលធ្វើលើការងារសប្បុរសធម៌ ដូចជាការចែកអាហារ សង់សាលារៀន ធ្វើផ្លូវ សង់ស្ពាន ចែកសៀវភៅ និងចែកកង់ដល់សិស្សតូចៗ ជាដើម។ ថ្វីបើការលក់សៀវភៅបានកម្រៃតិច ក៏ពិតមែន តែលោកឧកញ៉ាសប្បាយចិត្តនឹងការចែករំលែកចំណេះដឹង ក៏ដូចជាសប្បុរសធម៌ដល់សិស្ស និស្សិត ប្រជាពលរដ្ឋទូទៅ ព្រមទាំងព្រះសង្ឃ ដែលមានការខ្វះខាត បានទទួលអំណោយជាអំណាននេះឥតគិតថ្លៃ។
គួរបញ្ជាក់ដែរថា មកទល់ពេលនេះ លោកឧកញ៉ា វេជ្ជបណ្ឌិត គួច ម៉េងលី បាននិពន្ធសៀវភៅ បានចំនួន ៨ ចំណងជើងហើយ នៅក្នុងនោះមានដូចជា ទី១. អ្នកជាមនុស្សល្អ ល្អប្រសើរ និងល្អអស្ចារ្យ ទី២. ទស្សនៈអាជីវកម្ម គួច ម៉េងលី ទី៣. ជំនួបតុកាហ្វេ រវាងដុកទ័រ ម៉េងលី និងខ្ញុំ ទី៤. ភ្នំដងរែកទីពុំអាចភ្លេច ទី៥. ១០៨ ចក្ខុវិស័យ គួច ម៉េងលី ទី៦. គំនិតរកស៊ី គួច ម៉េងលី ទី៧. បណ្ដុំទស្សនៈ គួច ម៉េងលី និងចុងក្រោយនេះ ទី៨ មានចំណងជើងថា កម្រងកំណាព្យពីដួងចិត្ត គួច ម៉េងលី៕
ហ៊ាន រង្សី
ហ៊ាន រង្សី
