.jpg)
ទិដ្ឋភាពស្ងប់ស្ងាត់នៃបរិវេណបុរាណស្ថាន អង្គរវត្ដ ជាឱកាសឱ្យភ្ញៀវទេសចររីករាយនឹងសម្រស់ធម្មជាតិ។ ហុង មិនា
សៀមរាប៖ វាមិនស្ថិតក្នុងទីឋានស្ងាត់ជ្រងំ ទើបត្រូវបានរកឃើញជាថ្មីក្នុងទសវត្សរ៍ឆ្នាំ ៨៤០ ដោយជនជាតិបារាំង ហេនរី មូហត។
វាមិនមែនជាវិមានដ៏គួរឱ្យភ័យខ្លាច ពេលកម្ពុជាធ្លាក់ក្នុងភ្នក់ភ្លើងសង្គ្រាមនាទសវត្សរ៍ឆ្នាំ ១៩៧០ ដែលមនុស្សរាប់លាននាក់ស្លាប់ និងជញ្ជាំងប្រាង្គប្រាសាទដិតដាមដោយស្នាមទម្លុះនៃគ្រាប់កាំភ្លើង។
វាក៏មិនមែនជាទីកន្លែងធ្លាប់តែអ៊ូអរដូចកាលពីប៉ុន្មានឆ្នាំមុន ដែលបរិវេណប្រាសាទនីមួយៗជន់ទៅដោយភ្ញៀវទេសចរមកពីជុំវិញពិភពលោក។
អង្គរវត្ដ នាពេលនេះ ក្លាយជាទីឋានស្ងប់ស្ងាត់ជាថ្មី តែពោរពេញដោយសន្ដិភាព ដែលមនុស្សម្នាអាចរីករាយក្នុងការសម្រាក និងចាប់យកអារម្មណ៍បែបធម្មជាតិ ហាក់បីដូចជាបានវិលទៅកាន់អាណាចក្រដ៏រុងរឿង។
សមាគមសណ្ឋាគារកម្ពុជា (CHA) សាខាខេត្ដសៀមរាប បង្កើតយុទ្ធនាការ «អង្គរមួយ ជីវិតមួយដង» ឬក៏ #AngkorLikeNeverBefore និងអំពាវនាវដល់ប្រជាពលរដ្ឋខ្មែរ និងជនបរទេសនៅកម្ពុជា មកកម្សាន្ដក្នុងខេត្ដសៀមរាប។
លោក ដេវីដ ចាយ៉ាពីយ៉តធ៍ ប្រធាន (CHA) សាខាខេត្ដសៀមរាប បានឱ្យដឹងថា៖ «នេះជាយុទ្ធនាការដែលត្រូវបានបង្កើតឡើង ដើម្បីបង្ហាញពីឱកាសដំណើរកម្សាន្ដបែបធម្មជាតិអំឡុងពេលជួបវិបត្ដិកូវីដ»។
នារីវ័យក្មេងបង្ហាញខ្លួននៅបរិវេណប្រាសាទក្នុងវីដេអូផ្សព្វផ្សាយ ៣០ វិនាទី។ រូបថត សហការី
វីដេអូឃ្លីបរយៈពេល ៣០ វិនាទី បង្ហាញពីគោលដៅទេសចរណ៍សំខាន់ៗមួយចំនួននៅសៀមរាប ដោយចាប់ផ្ដើមពីនារីម្នាក់លម្ហែក្នុងបរិវេណប្រាសាទយ៉ាងស្ងប់សុខ បន្ដទៅទិដ្ឋភាពលើខ្នងភ្នំគូលែន របាំប្រពៃណី ការសម្ដែងសៀក ស្នាដៃសិប្បកម្ម ភូមិឋាន វាលស្រែ បឹងទន្លេសាប មុនពេលបញ្ចប់ត្រឹមស្នាមញញឹមរបស់ពលរដ្ឋខ្មែរ។
វីដេអូត្រូវបានផលិតបំណងផ្សព្វផ្សាយនៅលើបណ្ដាញសង្គមអំពីបទពិសោធដ៏វិសេសក្នុងកាលវេលាដែលអង្គរវត្ដគ្មានភាពអ៊ូអរ។
លោក ដេវីដ ជាអ្នកគ្រប់គ្រងសម្ព័ន្ធសណ្ឋាគារភូមិអង្គរ និងសហស្ថាបនិក Kulen Elephant Forest ប្រាប់ ភ្នំពេញ ប៉ុស្ដិ៍ ថា៖ «សៀមរាបសម្បូរសកម្មភាពកម្សាន្ដជាច្រើន និងតែងតែទទួលភ្ញៀវទេសចរយ៉ាងច្រើន។ វាធ្វើឱ្យពួកគេទទួលបានភាពរីករាយ»។
លោក ដេវីដ ជាកូនកាត់ខ្មែរ-បារាំង ដែលក្រុមគ្រួសារបានធ្វើការវិនិយោគលើវិស័យបដិសណ្ឋារកិច្ចតាំងពីឆ្នាំ ១៩៩៣ ដែលជាផលិតករសណ្ឋាគារដំបូងបំផុតមួយនៅសៀមរាប។
យុវជន ដែលក្លាយជាប្រធានសមាគមសាខាសៀមរាប ក្នុងឆ្នាំ ២០២០ នេះ បានឱ្យដឹងថា៖ «សៀមរាប និងវិស័យទេសចរណ៍ក្លាយជាជីវិតរបស់យើង និងជាអ្វីដែលខ្ញុំយកចិត្ដទុកដាក់បំផុត។ បច្ចុប្បន្ននេះជាឱកាសដ៏មានកំណត់ក្នុងការរីករាយនូវសកម្មភាពដ៏ស្ងប់សុខ»។
កសិករនៅលើវាលស្រែស្ថិតក្នុងវីដេអូផ្សព្វផ្សាយ ៣០ វិនាទី។ រូបថត សហការី
ហាសថេក (#) ជាផ្នែកសំខាន់មួយនៃបណ្ដាញសង្គម និងអនុញ្ញាតឱ្យមនុស្សជុំវិញពិភពលោកមើលឃើញ និងទាក់ទងគ្នាតាមរយៈប្រធានបទនានា។
លោក ដេវីដ ដែលអាចនិយាយភាសាខ្មែរបានយ៉ាងល្អ បានពន្យល់ប្រាប់អំពីឥទ្ធិពលនៃសញ្ញាហាសថេក #OpenInSiemReap ដែលជូនដំណឹងថា សៀមរាបនៅតែបើកដំណើរការជំនួញក្រោយពីធ្លាក់ចុះចំនួនភ្ញៀវយ៉ាងច្រើន។
លោកនិយាយថា យុទ្ធនាការ «អង្គរមួយ ជីវិតមួយដង» ឬ #AngkorLikeNeverBefore បានផ្ដល់ឱកាសដ៏វិសេសសម្រាប់ទេសចរក្នុងស្រុក។
សហស្ថាបនិកជំរំដំរីអាយុ ២៤ ឆ្នាំរូបនេះ បាននិយាយទៀតថា៖ «នេះជាឱកាសតែម្ដងគត់ក្នុងមួយជីវិតរបស់អ្នក ដែលអាចមកទស្សនាប្រាសាទទាំងអស់ក្នុងភាពស្ងប់ស្ងាត់ បើគ្មានមនុស្សទេនោះ ប្រាសាទនឹងទទួលបានមន្ដអាគមម្យ៉ាងដែលមិនអាចពន្យល់បាន»។
លោកបានប្រាប់ ភ្នំពេញ ប៉ុស្ដិ៍ ថា៖ «កាលកុមារភាព ការទស្សនាប្រាង្គប្រាសាទអង្គរវត្ដ មានលក្ខណៈខុសប្លែកពីអំឡុងពេលសម្បូរភ្ញៀវមុនវិបត្ដិកូវីដ។ ប្រាសាទមិនសូវមានមនុស្សអ៊ូអរ ហើយអ្នកអាចស្ដាប់ឮសំឡេងធម្មជាតិ»។
លោកនិយាយថា ភ្ញៀវអាចទទួលបាននូវបទពិសោធស្រស់ស្រាយពីធម្មជាតិ។ ដោយធ្លាប់តែមានវត្ដមានភ្ញៀវច្រើនសន្ធឹកដែលបានកែប្រែទីឋានធម្មជាតិ វាជាឱកាសដ៏វិសេសដែលភ្ញៀវទេសចរបានរីករាយជាមួយនឹងសម្រស់ប្រាសាទបែបធម្មជាតិពិតៗនាពេលនេះ។
សមាគមសណ្ឋាគារកម្ពុជា CHA បានបង្កើតយុទ្ធនាការនេះឡើង និងបានសហការជាមួយនឹងសៀករបស់អង្គការហ្វា និងក្រុមហ៊ុន Grasshopper Adventures ដើម្បីធ្វើការផ្សព្វផ្សាយវីដេអូរយៈពេល ៣០ វិនាទីនោះនៅជុំវិញពិភពលោក។
ចម្លាក់សត្វនៅស្រះដំរីលើខ្នងភ្នំគូលែន គោលដៅទេសចរណ៍សំខាន់មួយ។ ហុង មិនា
លោក ដេវីដ បានបន្ដថា៖ «យើងអាចសង្ឃឹមថា គំនិតផ្ដួចផ្ដើមនេះនឹងទាក់ទាញអ្នកដែលចាប់អារម្មណ៍នឹងគោលដៅទេសចរណ៍លំដាប់ពិភពលោកក្នុងសភាពស្ងប់ស្ងាត់។ ក្នុងនាមជាអ្នកប្រកបអាជីវកម្មសណ្ឋាគារ យើងមិនខ្វះសកម្មភាពកម្សាន្ដ និងរង់ចាំស្វាគមន៍វត្ដមានភ្ញៀវជានិច្ច»។
ក្នុងអំឡុងពេលពិភពលោកកំពុងតែប្រយុទ្ធប្រឆាំងនឹងកូវីដ ១៩ លោក ដេវីដ ដែលបានបញ្ចប់ការសិក្សាផ្នែកសេដ្ឋកិច្ច និងហិរញ្ញវត្ថុ មកបង្កើតគម្រោងជំរំដំរី ក្នុងឆ្នាំ ២០១៧ បាននិយាយថា ទេសចរណ៍នៅសៀមរាប មិនខុសអំពីគោលដៅទេសចរណ៍លំដាប់ពិភពលោកដទៃទៀត នឹងចាប់ផ្ដើមងើបឡើងវិញព្រមៗគ្នា។
លោកនិយាយថា៖ «យើងមិនដឹងពីពេលវេលាច្បាស់ទេ តែយើងអាចសង្ឃឹមថា កិច្ចខិតខំប្រឹងប្រែងចាក់វ៉ាក់សាំងទូទាំងពិភពលោក និងការគ្រប់គ្រងជំងឺឆ្លងរបស់កម្ពុជាបានយ៉ាងល្អនេះ នឹងជួយឱ្យយើងមើលឃើញនូវលទ្ធផលក្នុងពេលឆាប់ៗខាងមុខ»។
សមាគមសណ្ឋាគារកម្ពុជា បង្កើតឡើងក្នុងឆ្នាំ ២០០៨ ដែលមានតួនាទីផ្សព្វផ្សាយគោលដៅទេសចរណ៍ព្រះរាជាណាចក្រកម្ពុជាលំដាប់ពិភពលោក។
បច្ចុប្បន្នសមាគមមានសមាជិក ១១៥ ដែល ៣៧ សមាជិក ស្ថិតក្នុងខេត្ដសៀមរាប៕ HR
